Mawwan Kaji Mare Ni Buga de bai n htang wa ai rai tim, dum n ta n lu mat sai Mung shawa ni law ai majaw, garum ningtum hkyak hkyak ra taw nga

Hpakant Mawwan Kaji mare na mung shawa ni Hpyen yen dabang kaw lam shagu mayak lam ni law wa ai majaw, mare buga de bai n htang wa na matu hkyen shajin taw sai re.

Mawwan Kaji hte Sutngai Yang buga hpung ni hpe mare buga de bai wa nga mai sai lam, Wunpawng Mungdan Shanglawt Asuya kaw na lai wa sai May shata hta tara shang laika hte tsun shana wa ai lam nga ai hpe chye lu ai.

Shanglawt Asuya maga tsun shana wa ai rai tim, mare kaw Myen hpyen ni naw nga taw ai majaw, Mare buga wa na lam the seng na Myen hpyen maga de bai tang shawn ai hpang, Myen hpyen maga na mung ahkang lu sai majaw, mare buga wa na matu hkyen shajin taw sai lam chye lu ai.

Mawwan kaji kaw nga ai Myen hpyen hpung ni htawt mat ai hpang mare kata Nanghpam lusha ai ni shang shara la nna, dum n ta shagu na arung arai wan sumri yawng lagu dut sha kau ya ai lam, dai ginra na lit nga ai Salang langai KNG shiga de n dai zawn tsun dan wa ai re.

“Nta shagu na wan sumri yawng lagu raw la kau masai, yawng nnan na bai galaw la ra mat sai, n ta shagu na wan sumri hkan lagu raw la na, kata na magri manu hku dut sha ma ai,” nga tsun ai re.

Mawwan Kaji mare gaw lai wa sai 2024 ning May shata daram kaw Myen hpyen ni htu lung wa ai majaw, hprawng shakram da ai mare kahtawng langai mung rai nga ai.

Mung shawa ni hprawng shakram kau da ai hpang, dai mare hpe myen hpyen maga wan nat ai majaw, mung shawa dum n ta law law mung wan hkru hten za hkrum wa sai re.

Wan hkrum ai kaw nlawm ai dum n ta n kau hpe lagut ni hkrup mara adup hpaw nna, nga n mai mat na madang hku rai mat sai lam n dai zawn matut tsun dan ai re.

“ Wan hkru ai kaw n lawm ai dum n ta nkau mung la hpa n nga sai, yawng adup hpaw sinat pala hkang ni hkrai rai mat sai nnan kaw na nan bai gaw gap la ra mat sai,” nga tsun ai.

Mawwan Mare ni dum n ta buga bai n htang wa na lam hte seng na KIO asuya maga ahkang lu ai hpang, Myen hpyen dap kaw ahkang bai hpyi nna, mare buga wa na mahkrun pru wa ai re lam chye lu ai.

Mawwan hpyen yen mung shawa ni gaw, hpyen yen dabang kaw nga taw ai rai tim, gadai gara wuhpung kaw na garum ningtum mung n lu mat ai majaw, wa na maga de hkrai malawng myit mat ai lam Myitkyina kaw sa du hprawng yen taw ai Mawwan ginra masha langai mung n dai zawn matut tsun ai re.

“ Wa na lam hkrai myit mat saga ai. N dai kaw nga tim hpa gadai kaw na garum ningtum lu ai mung n rai, bungli gaw n lu, mai byin ai hku sak hkrung taw ra ai masa lam hpe myit yu nna, hpa byin yang byin tinang mare buga de she bai wa saga ngu myit nga ga ai,” nga tsun ai re.

Mawwan kaji mare kaw nga ai Myen hpyen nig aw, Mawwan kaba maga de bai htawt sit mat nna, Mawwan kaba hpungkyi jawng Phone shadaw  jun ai kawng n tsa kaw bai dap jung shara jahkrat taw ai lam chye lu ai.

Mawwan Kaji mare ni dum n ta de bai n htang wa na matu ja gumhpraw hte dinghku arung arai ni hkyak hkyak garum ningtum ra taw ai lam chye lu ai.

Dai mare ni gaw nnan kaw na bai wa gaw de ra ai mare kahtawng re majaw, garum kahtau wuhpung, Lauban launa ni kaw na mung garum madi shadaw la na hpe mare masha ni myit mada ra sharawng nga ai re.

Hpakant ginra kaw n dai laman mare buga de bai n htang wa na matu hkyen taw ai mare kahtawng ni gaw, Mawmaw Layang, Mawwan kaba, Sut Ngai Yang mare ni re lam chye lu ai.