Myitkyina – Sumprabum lam, Lamung Zup mare kaw dap jung nga ai Myen hpyendap shagyit hta lam lai hkawm sa ai ni hpe jep joi ai lam grau laja lana galaw nga nna, lamung zup shagyit hta mungmasha marai 5 mung rim woi da hkrum ai nga ginra masha ni tsun ai re.
Rim woi da hkrum ai marai 5 gaw, lahta de na cycle hte yu wa let lai sa ai ten, jep joi hkrum nna, rim woi da hkrum ai hpe chye lu ai. Dai ni gaw gara kaw na, kadai ni re ngu hpe gaw ya du hkra hpa shiga nlu chye lu ai lam tsun ai re.
“Lahta de na Sengke hte yu wa ai ni rai ma ai, maram yu yang, Jahtu hkawngma galaw na yu wa ai ni kun rai sam ai, ya dai marai 5 gaw gara kaw na gadai ngu ai hpe n chye lu ai rai nna, gara shara kaw rim woi da ai ngu hpe mung n chye lu ai nga” tsun ai re.
Lai wa sai July 31 ya shani, Lamung zup shagyit hta rim hkrum ai hpang, shiga hkrak tup n chye lu nna, dai hpang August 3 ya dai ni du hkra, dai lam hku lai sa ai yawng hpe myen hpyendap gaw laja lana jep joi nga nna, mawdaw cycle ni dinggreng jep hkam nga ai masa hpe, lam lai sa ai ni tsun dan ai kaw na chye lu ai re.
Madung gaw ramma hte la wa ngan ni hpe grau laja lna jep joi nna, phone ni hpe kata lam jep hkrawk let, marai langai hpe ganoi hkying hkum mi ram na hkra aten la jep ai lam ni galaw nga ai hpe matut chye lu ai re.
Lamung zup shagyit gaw, Mung shawa ni hpe laja lana jep joi nga ai shagyit sha n ga, Jak Sau, N-gu, Jak rai ni htaw shalai wa ai rai yang, gunrai manu hta hkan nna, gumhpraw dingyang hta ai shagyit langai mung rai nga ai.
Dai lam nmaw kaba gaw, Sumprabum, Putao de lung ai sha n ga, Mali Hkahku Ja maw ginra ni de hkawm sa ai lam n maw kaba langai mung rai nga ai.
Mali hkahku de hkawm sa ai mung shawa yawng gaw, Tayangzup hte Myitkyina lapran mawdaw hte hkawm sa ra ai rai nna, Tayang Zup kaw na she Jakli hte bai hkawm sa ai rai nga ai.
