Waimaw Kanpaitai lam nmaw kaba n tsa ga sharut gyi ai shara law taw ai majaw, hkawm sa hkawm wa nmai ai lam ginra mung shawa ni tsun ai.
July 15 ya shana Lana Hka rum du wa mahka na gat seng dut ai shara grup yin kaw ga sharut bai gyi ru wa ai majaw, gat seng n kau kaput hkrum ai sha n ga, Sadung hte Kanpaiti lam lapran shara 10 daram kaw lam gyi ru taw ai nga ginra mung shawa langai KNG Shiga de n dai zawn tsun dan ai re.
“ Ya hte Sadung mare baw Lajawng mare makau kaw gyi ru mat ai hpe gram ngut ai bat mi daram sha naw rai yang, Lana hkarum kaw bai gyi, ndai laman shani shana marang htu ai majaw, anhte Sadung hte Kanpaiti lapran shara 10 daram kaw pat taw ai nga tsun ma ai,” nga Sadung ginra masha langai tsun ai re.
Lam gyi ru taw ai majaw, Waimaw Kanpaiti lam lapran mawdaw latsa jan pat hkrum taw ai hpe chye lu ai.
Lai was ai July shawng na bat hta Lajawng mare makau kaw lam gyi ru ai majaw, dai lam kaba hpe gram ngut ai bat mi daram pyi rai nna shi yang, kaga shara ni de bai gyi ru wa ai lam mung rai nga ai.
Ndai laman lam bai kahtap gyi ru ai majaw, mawdaw ni tsep kawp hkawm sa n mai mat sai lam chye lu ai re.
Ya ten Sadung Hkarum gat yan kaw mawdaw latsa daram pat hkrum taw nna, sa mung n mai wa mung n mai rai yak hkak hkrum taw ai hpe chye lu ai.
Ndai laman Waimaw Kanpaiti lam gyi ru taw ai hpe gram na rai yang, n htoi bat lapran mi daram matut na mai ai lam ginra masha ni tsun ai.
Dai ning Jinghpaw mung de marang htu sawng ai majaw, lam n maw kaba ni ga sharut gyi law taw ai hpe mu mada lu nga ai re.
Dai zawn ga sharut gyi ai lam gaw, sut n hprang, ga sau htu law ai majaw mung re lam, makau grup yin hpe gawn hkang ai ni tsun maram da ai re.
