Jinghpaw Mung Sagaing Jarit mayan Myen Hpyen Nbungli Bawm laja lana sa jahkrat bun nga
Sagaing hte Jinghpaw Mung jarit lapran Katha Shwegu, Mawlu, Meza grup yin ni de n dai laman Myen Hpyen nbungli bawm laja lana sa jahkrat bun taw ai nga, shawng lam hpyen magam gun ni tsun ai kaw na chye lu ai.
Ya ten, Shwegu ginwang Saga Kung hte Taryar Kung mare ni hta majan byin taw nga nna, Myen Hpyen dap Y12 Nbungli, Jet Nbungli ni jai lang nna, bawm sa jahkrat bun nga ai lam, Shwegu ginra masha langai KNG shiga de n dai zawn tsun ai re.
“Ya ndai laman Myen ni Manmaw de lung na matu htu taw ai dai kaw Myen hpyen dap maga mung sum machyi law sam ai, nbungli bawm ja ji ja gang sa jahkrat bun taw nga ai,” nga tsun ai re.
Matut nna, Indaw kaw na Meza de htim gasat sa wa ai Myen hpyen hpung hpe PDF dap maga lam lapran hkap shingla gasat ai hta sum machyi law ai majaw, nbungli bawm matut ndi sa jahkrat bun nga ai re lam matut chye lu ai.
Shwegu Mandalay Nmaw lam kaba mayan hpe Myen hpyen maga up madu da ai majaw, hkrunlam hkawm mung shawa ni mung ding yang shani shagu ngu na lai hkawm taw ai hpe chye lu ai.
Ya majan byin nga ai ginra gaw, KIA maga na, hkawm sa ai lam n galaw na matu tsun ndau da ai ginra mung rai nga ai.
KIA ndau laika shapraw wa ai hpang, Shwegu mare na mung shawa htinggaw 300 hkawt gaw, tinang man ang ai shara de hprawng yen sai rai tim, law malawng gaw, dai ni du hkra muklum kaw sha naw nga taw ai lam chye lu ai re.
Myen Hpyen maga na gaw, Manmaw de hpyen n-gun jat lu na matu hte Manmaw hpe bai gasat zing madu na matu shani shagu Shwegu Ginra de hpyen n-gun htu taw ai majaw, majan dingyang byin taw ai mung rai nga ai.
