Namtau mare kaw na lamu ga zing hkrum ai mung shawa ni hpe, Kokang MNDAA hpyi hpun da ai Miwa lauban langai jahkrit shama galaw taw nga ai lam, lamu ga zing hkrum ai amyu shayi wa tsun ai re.
Namtau mare mung shawa htinggaw 6 a kumshu sun hpe Kokang hpyi hpun ai lauba langai zing kau ya ai majaw, Shiga dap ni de matut mahkai shiga jaw ai majaw nga nna, n dai laman jahkrit sharim ai lam ni bai sa galaw taw ai lam dai jahkrit hkrum ai amyu shayi wa KNG Shiga de n dai zawn tsun dan wa ai re.
“Shiga dap ni hte Matut mahkai ai nga na sa jahkrit ai, dai majaw, n dai laman gaw gara hku rai na kun? naw la yu taw nga ai, anhte hkai da ai kumshu sun hpe yawng sa jahten kau ya ai majaw, gadai lit n la ya na, yawng mu chye u ga ngu shiga dap the matut ai hpe shan hte n ra na jela bai sa tam wa ai ga rai nga ai,” nga tsun ai re.
Namtau mare makau na mung shawa ni hkai da ai kumshu sun ni yawng hpe jahten kau ya ai majaw, dai ginra na mung shawa ni gaw, shiga galaw ya na matu KNG shiga de shiga jaw wa ai lam rai nga ai.
Dai zawn shiga jaw ai majaw ngu nna, ya kalang bai jahkrit sharim ai lam ni galaw nga ai hpe chye lu ai.
Dai lamu ga gaw, moi ban prat law law kaw na mung shawa ni galaw lu galaw sha wa ai lamu ga hpe, Kokang miwa ni shang wa nna, dai lamu ga gaw, Asuya bungli masing nga ai lamu ga re ngu na, zing kau ya ai lamu ga re hpe chye lu ai.
Ndai lamu ga masa lam the seng na ginra masha ni gaw, Kokang MNDAA Asuya tsang hte tsang ni kaw laika hte mung, n gup ga hte mung tsun hpyi shawn wa ai rai tim, Kokang maga na mung hparan dawdan ya ai lam dai ni du hkra hpa n nga ai re hpe chye lu ai.
