KIA Dung (26) Ginra Lungtung Mare grupyin kaw Gasat Gala Majan Byin Nga
Nawng lut Ginwang, Lungtung mare makau grup yin kaw dai hpawt manap hkying 5 daram kaw na Myen Hpyen dap hte Sam Hkyeng SNA ni KIA nga ai maga de htim gasat wa ai majaw, majan byin nga ai lam ginra masha ni tsun ai re.
Dai hpawt manap jau kaw na, Sinat laknak kaji kaba n sen ngoi gadu wa ai hpang, lahkawng maga gasat poi byin nga ai gaw, dai na maga de du hkra matut byin nga ai lam, ginra masha langai KNG shiga de n dai zawn tsun dan wa ai re.
“Dai hpawt hkying 5 ram kaw na SNA ni shawng gap hpang wa ai, Hepan lam numbraw de htim gasat hpang wa ai ga rai nga ai, Hepan lam numbraw kaw na gaw KIA Dung (26) Tung Pin mare de man yawng wa na masa nga ai,” nga tsun ai re.
Lungtung kaw dung ai Myen hpyen ni gaw, KIA Dung (26) de sa ai lam Hepan lam numbraw hpe htim gasat nga ai rai nna, dai shara hpe gasat ngut ai hpe Dung (26) hpe bai htim gasat nna, Nawnglut Ginra yawng hpe Sam Hkyeng SNA ni gasat up madu na masing re nga, ginra mung shawa ni tsun ai re.
Ndai laman Sam Hkyeng SNA maga na hpyen n-gun law law dai ginra de jat bang da ai lam ni nga ai hpe sagawn chye lu ai.
Sam Hkyeng SNA ni gaw Lungtung kaw na htim gasat lung wa nna, Min Zay Thant Pyithutsit ni gaw, Hpakant maga de na htim gasat yu wa na masing re lam matut tsun ai.
Ndai laman Nawnglut ginra de majan matut manoi laja lana byin wa na masa nga ai lam ginra masha ni tsun maram da ai re.
