Myitkyina muklum kata kaw, June shata mi laman kaw kashun kashe hkrum ai majaw, mung shawa marai 3 si hkrum wa ai lam, garum kahtau hpung ni kaw na chye lu ai.
Dai si hkrum ai marai 3 hta, La langai, Num 2 rai nna, Janmai Kawng, Wa Sat ai makau, Manhkring Saturday jawng lam hte Rambu lawk ni hta kashun hkrum ai kaw si hkrum wa ai ni re lam garum kahtau hpung na lit nga ai ni KNG de n dai zawn tsun dan ai re.
“Ndai June shata mi laman kashun mya hkrum nna, si ai gaw, marai 3 re ga rai nga ai, langai gaw, janmai kawng Wat sat dut ai makau kaw, langai gaw, Manhkring sturday jawng lam hte malizup tsirung lam ni kaw byin ai lam ni re ga rai nga ai,” nga tsun ai.
Dai mabyin lam hta June 23 ya shani Janmai kawng lawk wasat dut ai shara makau kaw byin mat ai lawng lam gaw, asak 31 ning re ai la langai hpe hkau chyap ai manang langai baw abyen ga ya nna, Ph hte Sengke kashun la mat ai re lam chye lu ai.
Dai zawn byin ai lahkawng ya na ai hpang she Malizup tsirung makau kaw moi mang hpe bai sa mu ai re lam chye lu ai.
Dai Salang la shabrang wa hpe gayet sat ai ngu, n’tsen n hten ai masha hpe mung gaw mu da ai rai nna, tara jewat rim ahkyak la na matu galaw taw nga ai lam dum n ta masha the ni nawn ai ni tsun ai re.
Hpang langai bai rai yang gaw, Manhkring Saturday jawng lam hku jahpawt hkying 6 kaw bungli sa wa ai amyu shayi langai hpe ramma la kasha marai 3 rai kashun ai lam byin wa ai rai nga ai.
Dai amyu shayi wa gaw, Sengke na di hkrat nna, ningma hkang sawng ai majaw, tsi rung de htaw sa mat ai rai tim, tsi rung du ai hpang, yuptung hkying 11 kaw si hkrum mat ai lam chye lu ai.
Janmai kawng kaw byin mat ai lam bai rai yang gaw, Wa sat ai makau lam hku Ma ni the sengke jawn wa lai wa ai amyu shayi langai hpe hpang kaw na kawa tawng the baw kawa dup galau da nna, Phone hte gumhpraw sumbu kashun la mat ai lam nga ai hpe chye lu ai.
Dai amyu shayi wa mung abyen hkrum ai kade nna ai hpang si mat ai lam hpe chye lu ai.
Ya ten Myitkyina muklum kata na, Malizup lam, Manhkring, Shwezet, Rambu, Dapkawng, Janmai kawng lawk ni hta dai zawn rai kashun hkrum ai mabyin lam ni jahkring hkring grau grau byin wa ai hpe mu mada wa lu ai lam, ginra masha ni tsun ai re.
Dai zawn rai kashun hkrum ai mabyin lam ni jahkring hkring byin nga ai rai tim, kashun ai masha ni hpe n lu rim ahkyak la ai majaw, mung shawa ni yawng mung sadi maja nna hkrai hkawm sa taw ra ai lam chye lu ai.
