Dai Hpawt Manap jau, Lawnghkang gat de gat mari sa ai mung shawa ni a sengke hpe Myen hpyen ni hkap rim kashun la taw ai nga ginra masha ni tsun shana wa ai re.
May 8 ya jahpawt Myen Hpyenla ni gat sa gat wa mung mare masha ni a sengke hpe jep masu su rai nna, la mat wa ya ai lam ginra amyu shayi langai KNG shiga de n dai zawn tsun dan ai re.
“Mawwan gat sa lam kaw Myen ni dai hpawt jau na hkap taw ai, shawoi gaw ding re jau na hkap ai galoi n nga ga ai, dai hpawt gaw, hpyen hking hte nan hkap taw nna, sengke jawn lai wa ai ni hpe လိုင်စဉ်ပါလား၊ ယာဉ်မောင်းလိုင်စဉ်ပါလား၊ nga amyu myu hkap san jep masu na, n lawm ai nga jang ပြန်လို့ရပြီ nga lagaw lam wa kau shangun ai,” nga Hpakant Mawwan na amyu shayi langai tsun ai re.
Ndai laman Myen Hpyen dap hte KIA dap lapran Lawnghkang grup yin kaw hpyen masa shaja hkat nga ai ten, ya na zawn mung shawa ni a rai hkap kashun mya la taw ai masa re nga, ginra masha ni tsun ai.
Mung Shawa Sengke hkap kashun ai ni gaw, Hpakant de nnan du wa ai hpyenla ningnan ni re lam ginra masha ni tsun ai.
Ya na zawn hpyen hte n seng ai mung shawa ni hkawm sa ai Sengke hpe hkap rim la kau ya ai gaw, n tara ai lam re nga, ginra masha ni tsun pawt taw nga ai re.
Myen hpyen ni gaw, ya na zawn Sengke hkap rim kau ya ai rai tim, bai n jaw mat ai lam sagawn chye lu ai re.
Majan byin taw ai kaw ya na zawn Myen Hpyen ni mung shawa sengke rim ai lam gaw, hpyen la ni da sang mung shawa rai kashun mya la mayu ai majaw re lam, Hpakant mung shawa ni tsun ai re.
Lawnghkang Mawsiza grup yin hpyen masa shaja hkat nga ai ten, Dai hpawt hkying 10 kaw nbungli du nna, bawm wa jahkrat bun kau da ai lam ni nga ai hpe mung sagawn chye lu ai re.
