Hpakant lam Namya hte Hpakant lapran Namting hka kaba ai majaw, Namting mare grup yin lam hten nna, hkawm sa hkawm wa yak hkak taw nga ai lam ginra masha ni kaw na chye lu ai re.
Namting mare kaw lai wa sai Bat kru ya shana hte laban ya shani marang kaba htu ai majaw, Namting hka kaba wa nna, mare lam n-maw hka yawng hpring kabrat mat ai majaw, hkawmsa hkawmwa lam ni yak hkak taw ai lam chye lu ai.
Namting mare grup yin ya ten lam hten, lam nya nna, Mawdaw ni hpe magwi hte dun garawt na lai lai ra taw ai masa lam hte seng nna, dai ginra na Salang langai KNG de n dai zawn tsun dan ai re.
“Dai shara gaw, Maning Shanglawt ni lu zing kau ai hpang, lam galaw na matu htu ahka da ai rai nga ai, dai hpang Myen ni grai bai htu lung wa ai majaw, n galaw byin mat ai gaw dai ni du hkra rai nga ai,” nga tsun ai re.
Namting mare grup yin na Nmaw lam kaba gaw, shaning shagu lanam ta ten shaning shagu hkawm sa yak ai shara langai mung rai nga ai.
Hpakant lam mayan hpe lai wa sai Shata hta KIA maga pat da ai kaw na, Ma ni jawng lung hkawm sa hkawm wa ahkyak ai ten re majaw, bai hpaw dat ya ai rai nga ai.
KIA maga hpaw dat ya ai hpang, lanam ta ten du mat ai hte rau marang htu kaba ai majaw, lam nya nna, hkawm sa hkawm wa yak hkak mat ai rai nga ai.
Lawnghkang hte Namya lapran kaw lam hten taw ai masa hte seng nna Namya mare na mung shawa langai mung n dai zawn tsun ai re.
“Hpakant lam gaw ding yang shara shagu ngu na yak ai, lam apri rai mai chyang ai shara nau n nga ai, hkalik hkalawk lam ni hkrai re. byeng na masha gaw n nga, hta sha na ni hkrai rai ma ai. Ya rai tim mung shawa ni wang lu wang lang n lu hkawm ai. Gate law lam hten re majaw, lawan ra na daram n lu lawan Kalang lang Namya hte Hpakant sha pyi lani mi jan du lup hkawm ra ai ten nga ai,” nga tsun ai re.
Lai wa shaning hta KIA maga Hpakant lam Namya mare hpe KIA gasat zing kau lu wa ai hpang, dai lam mayan ma hkra hpe KIA Up madu wa lu ai hpang, dai ning April kaw na Myen ni bai htu lung wa ai majaw, KIA maga bai tat sum kau ra mat ai rai nga ai.
Ya ten Hpakant lam shara law malawng hta Pyithutsit ni dap jung shara jahkrat nna, nga taw nna, hkrun lam hkawm mung shawa ni hpe ladu lai san jep ai lam ni galaw nga ai sha n ga, gumhpraw hta sha Phone kaw Wechat app rawng ai ni hpe ahkyak la re lam ni galaw nga ai lam chye lu ai.
Myen Hpyen maga na gaw, Lawnghkang Bawm yam dap kaw dap jung shara jahkrat nna, Hpakant de shang ai mawdaw ni hpe laja lana san jep nna, Myihprap Wan rai ni hpe n shalai shangun ai lam chye lu ai re.
Ndai laman Hpakant ginra hta Sinat mahku n’sen zim taw ai rai tim, kata lam kaw hpyen masa shajin shagreng hkat taw nga ai masa lam re nga, Hpyen masa yu maram nga ai Hpakant ginra masha langai tsun maram da ai re.
