Ndai laman Jinghpaw Mung de shani shagu marang htu ai majaw, Mali hka hte kaga Hka Shi ni kaba taw ai lam chye lu ai.
Ndai laman marang htu law ai majaw, Wanleng lam mayan de na, lam nmaw kaba hkan hka hpring kabrat nna, hkawm sa hkawm wa yak hkak taw ai lam chye lu ai.
“Mana kaw na Mogaung hka, Mung Nyang Hka kaba wa ai majaw, mare ram ram lim mat ai, ya gaw yawng yak ai ten re nga yang, garum hkat na mung n loi yak ai ga rai nga ai,” nga Mogaung ginra masha langai KNG shiga de tsun dan ai re.
Mogaung Hka hte Mungnyang Hka kaba ai majaw, Mogaung Hopin, Monyin ginwang hkan na mare kahtawng n kau hka lim hkrum taw ai lam chye lu ai.
Lamu ga nyem nna, n ta hka yawng lu lim mat na zawn re ai hkan na mung shawa ni hpe gaw, Lahta tsang jawng ni hkan htawt sit da ai lam chye lu ai.
Ndai laman Jinghpaw Mung de shani shana Marang matut htu nga ding yang re majaw, Malihka tung kaba wa na hpe Myitkyina ginra masha ni myit tsang nga ma ai re.
