Hpyen masa lam a majaw, Sengtawng – Hpakant lam lapran Yuma mare kaw KIA maga lam pat da ai majaw, hkawm sa hkawm wa mung mare masha ni yak hkak taw nga ai lam ginra masha ni tsun ai re.
Tamahkan Gwihka Sengtawng Mawshan, Nam Maw, Sabaw, Kawngsan, mare hkan na mung shawa ni gaw ya ten Hpakant de sa na matu Jakli kaw kalang lu rap lai na matu hkying hkum 2,3 la nna, lai ra ai majaw, aten htum nna mayak lam ni byin hkrum nga ai lam ginra masha langai KNG de n dai zawn tsun dan ai re.
“ Mi shawoi ginhtawng kaw gaw hpun pyen mahkrai hkrai da ai, dai kaw na wang lu wang lang mai lai ai, Ya gaw Uru hka kaba wa sai re majaw, hpun pyen mahkrai gun kau ai hpang, Jakli the sharap taw ai rai nga ai, kaw mawdaw kalang lu lai na matu hkying hkum 2,3 la ra ai. Dai hku dinggren nna la jawng taw ma ai shani shagu mawdaw chyat re. Sengtawng – Hpakant lam Yuma kaw pat da ai gaw maning Sengtawng majan ten kaw na rai sai gaw, dai lam nmaw kaba pat kau ai hpang kaw na Sengtawng de na mung shawa ni Hpakant de sa na rai yang, Sabaw, Hpapyin mahkrai lam hku na hkrai lai taw ai rai nga ai,” nga tsun dan ai re.
Lai wa sai shaning kaw nna Sengtawng hte Hpakan sa ai lam Yuma mare kaw Wunpawng Mungdan Shanglawt Asuya kawn hpyen masa a majaw lam pat kau ai gaw dai ni ten du hkra matut naw pat da ding yang re lam chye lu ai.
Yuma kaw pat da ai majaw, Tamahkan, Gwihka, Seng Awng, Kayin Chaung , Sengtawng ,Mawshan, Nam Maw, Sabaw, Kawngsan, mare hkan na mung shawa ni gaw ya ten Hpakant de sa na matu Sabaw hte Hpapyin Hka daru kaw na rap ra taw ai re.
Dai Hkali daru kaw mawdaw langai rap yang lap hkying 9 jaw nna lai ra ai sha n ga, kalang lu lai na matu hkying hkum 2,3 na ai majaw n dai lam hpe lit nga ai ni hku na lawan hparan ya na matu ginra masha ni hpyi shawn nga ma ai re.
Dai shara kaw ginhtawng aten hta hpun pyen mahkrai hkrai da ai rai timung, June shata praw (6)ya shani kaw nna Marang htu Uru hka kaba wa ten du sai majaw mahkrai hpe gun kau nna, Jakli hte htaw sharap taw ai rai nga ai.
