Lawa Hpyen Yen Mung Shawa nkau Mare buga dum n ta de bai n htang wa nna, Laika Hpaji jawng ni hpe mung hpaw sharin taw nga sai lam, ginra masha ni tsun ai.
Mare buga gaw sharawt lam hta, jai lang na matu nga nna, Warazup Pyithutsit hpung ni kaw na, mare woi awn komiti de gumhpraw lap sen hkying mi garum wa ai lam dai mare na Salang langai KNG de ndai zawn tsun ai re.
“Warazup mare ni shawng mare de wa nga hpang ma ai, shan the wa mai nga ai masa hpe yu yang anhte Lawa mare ni mung mai wa nga sana n hten. Ngu na lit nga ai ni the jahkrup nna, wa ng ana matu dawdan wa ai re.” nga tsun ai.
Lawa mare gaw, lai wa sai April shata kaw, Warazup Pyithutsit hte Myen Hpyen hpung ni pawng nna KIA ni nga ai ginra de htim gasat wa ai kaw na, hprawng yen mat ai mare buga langai rai nga ai re.
Warazup Pyithutsit ni Lawa Mare makau grup yin na KIA dap shara hpe sa htim gasat ai kaw na majan byin wa ai rai nga ai.
Warazup Pyithutsit ni Lawa mare de htim gasat shang wa ai ten, lam lapran mung shawa mu mamu hpe Porter rim woi nna, Lawa mare hpe htim gasat zing kau ai re.
Lawa mare hpe htim gasat zing kau ai hpang rai tim, Mare dum n ta sin na nga taw ai asak kaba sai mung shawa n kau hpe gap sat ai lam ni mung galaw wa ai sha n ga, Mung shawa dum n ta law law hpe mung Wan nat jahten kau ya wa ai rai nga ai.
Ya mare buga dum n ta de wa na matu Lawa mare mung shawa ni hpe Warazup Pyithutsit ni kaw na Gumhpraw Lap Sen hkying mi garum jaw wa ai sha n ga, hkauna ni hpe mung jak the galau ya ai lam ni galaw ya ai lam n dai zawn matut tsun ai re.
“Mare de bai nhtang wa ai mung shawa ni hpe hkauna ni jak the galau ya ai, gumhpraw ni mung garum ma ai,” nga tsun ai re.
Lawa Mare masha ni gaw, Dai ning hkauna shang na matu aten dep wa ai rai nna, Ya hkauhting hkauna galaw let wa nga hpang nna, Jawng hpaji ni hpe mung hpaw taw nga sai lam chye lu ai.
Lawa ninghtawn kata na mung mare masha ni n ta buga de bai nhtang wa ai htinggaw 100 jan du sai rai nna, law malawng gaw Namti Hpyen yen dabang kaw naw matut shanu nga ai lam chye lu ai.
“Wa na matu madung myit wa ai lam gaw, masha buga kaw nga taw yang, garum ningtum lam ni yawm wa ai sha n ga, lamu ga hkauna ni hpe mung n kam hkam da ai majaw, wa na matu myit dawdan mat wa ai re lam,” matut tsun ai.
Mung Shawa ni mare de bai n htang wa ai hte rau, Mare kata na Hpaji jawng ni hpe mung hpaw sharin taw sai lam chye lu ai.
Lawa mare kaw nga ai hpaji jawng ni gaw, Myen Asuya n pu hpaw sharin ai jawng ni rai nna, Lahta tsang jawng, Lapran tsang jawng, Lawu tsang jawng masum nga ai re hpe chye lu ai.
Ya ten dai hpaji jawng ni hpaw sharin taw ai masa lam the seng na gara hku ni rai nga sai kun?
Lawa mare gaw, Myitkyina Hpakant Danai Lido lam kaba n tsa nga ai mare rai nna, Kamaing Hpakant de lai ai lam numbraw nga ai mare kahtawng langai mung rai nga ai.
Jinghpaw mung a matu, Hpyen masa, Sut masa lam hta ahkyak dik Lido lam kaba n tsa nga ai mare kahtawng langai mung rai nga ai.
