Mawwan Kaji Mare Na Mung Shawa Dum N’ta 57 Hpe Myen Hpyen Dap Wan Nat Jahten

Hpakant Mawwan Kaji Mare na mung shawa dum n’ta (57) hpe Myen Hpyen dap Wan nat jahten ai nga ginra masha ni tsun dan wa ai re.

May 19 ya shana hkying 10”30 daram kaw na Mawwan Kaji mare grup yin hta majan byin ai lam n nga tim, Myen Hpyen dap hte Pyithutsit ni mung shawa dum n ta hkan, shang shalau hkawm ngut ai hpang wan nat jahten wa ai masa re nga ginra masha langai KNG Shiga dap de n dai zawn tsun dan wa ai re.

“ Ya hte 16 ya shani Myen ni mare de shang shangun na, ahkyak ai rai ni la shangun ma ai, Dai kaw mung shawa ni social media kaw Myen ni hte pawng na lagut ni n dai zawn mung shawa arung arai shaw lagu ma ai lam ni ding yang mara taw ma ai. Dai na majaw kun gaw n chye ai, mana gaw hpa majan byin ai lam mung n nga, Tatma kawng na gap bun ai lam mung n nga re kaw na, hkru hpang wa ai re nga, hkying 10 chyen ram kaw na hkru wa ai yawng rai yang dum n ta (57) nat kau ya ma ai da.” Nga tsun dan ai re.

Mawwan Kaji mare gaw, lai wa sai shaning April shata kaw na Myen ni hpyen n-gun kaba hte Hpakant de htu lung wa ai majaw, hprawng yen kau da ai mare kahtawng kaba langai mung rai nga ai.

Mawwan mare Hkalup Hpung masha ni gaw, Myitkyina Janmaikawng de yen mat ai zawn, Kahtawlik hpung masha ni gaw Namhpyit Htoi San mare kaw hprawng yen ai lam chye lu ai.

Myen ni gaw, ကျောက်စိမ်းတောင် mahkrai baw na hpungkyi jawng kaw yen ai rai nna, Rahkaing ni gaw, Mashi Kahtawng Miwa Jawng kaw hprawng yen taw nga ai re.

Mawwan Kaji Mare na mung shawa ni gaw, dai ning lanam ta rai n shang yang, tinang mare dum n’ta de bai n htang wa lu na matu shakut yu ai rai tim, laknak hpai hpung lahkawng Maga na ahkang n jaw ai lam chye lu ai.

Mawwan Mare gaw Hpakant ginra a matu Hpyen masa lam hta ahkyak ai mare kahtawng langai re majaw, dai ning laman majan jahkring hkring byin ai lam hpe mu lu ai re.

Myen Hpyen ni gaw Ya ten Namhpyit Mawsiza Hka kau lam grup yin shara ni hkan nga taw nna, lai sa lai wa mung mare masha ni hpe ndum shami jahkring jahkra hkan san jep masu nna, lawm sa wa ai gumhpraw hte laga arung arai ni hpe hkap kashun la kau ya ai lam ni jahkring hkring galaw nga ai lam hpe ginra masha langai n dai zawn matut tsun dan da ai re.

“Myen Hpyen ni gaw, Namhpyit Mawsiza grup yin de nga ma ai, EPC wang kaw nga na Dai Zuk wang hkan pru shang galaw na nga ma ai. Shana rai jang lam de pru nna, lai sa lai wa mung shawa ni hpe ang katut san jep ai lam ni galaw taw ai ga rai nga ai. Mana mung Dingla langai na gumhpraw Sen 200 jan hte Phone hpe dai kaw jep ai Myen ni la kau ya ma ai.” Nga tsun ai re.

Hpakant ginra ndai laman laja lana gap gasat hkat ai lam n nga tim, Myen Hpyen maga na gaw, Hpakant de sinat laknak machyu pala, hpyen n gun jat la na matu shakut taw nga ding yang re hpe mu lu taw nga ai nga, ginra masha wa matut tsun dan ai re.

Hpakant hta ya na zawn hpyen masa shaja hkat nga ai majaw, mung shawa ni hkawm sa hkawm wa yak hkak taw nga ai sha n ga, gunrai manu tsaw rawt ai majaw mung grau na ginchyum chyat yak hkak taw nga ai lam chye lu ai.