Myen Hpyen dap hte Pyithutsit dap ni Hpakant ginra na KIA htim gasat zing da ai ginra yawng hpe bai lu up madu na matu hpyen n gun kaba htu nga ai majaw, Hpakant lam hpe pat da ai ya n htoi bat mi ram du wa nga sai re.
April 27 ya shani hta KIA ni pat hkum da ai lam hku na lai wa ai mawdaw 5 hpe KIA maga hkap jahkring rim woi da ai lam ni nga ai hpe chye lu ai.
Hpakant na yu wa ai mung shawa n kau hpe gaw shalai dat ai rai tim, Myen Hpyen dap maga, Lawnghkang Bawm Yam dap gate kaw hkap san jep ai lam ni galaw nna, bai shalai ai lam ni gaw nga taw ai hpe chye lu ai.
Ya ten Hpakant ginra hta Myen hpyen dap, Warazup Pyithutsit, Sam Pyithutsit, Zahkung Ting Ying Woi awn ai Pyithutsit ni pawng hpawm nna, hpyen shamu shamawt ai lam ni ding yang galaw nga ai hpe chye lu ai.
KIA KPDF pawng hpawm dap maga na mung, Myen Hpyen Pyithutsit ni hpyen shamu shamawt ai hpe Drone bawm hkan jahkrat bun ai lam ni ding yang galaw taw nga nna, Pyithutsit maga Si hkala ai lam shani shagu byin nga ai hpe sagawn chye lu ai re.
Hpakant ginra hta shani shagu hpyen masa shaja hkat taw nga nna, laknak kaba gap shapyen bun hkat ai lam hte Drone bawm jahkrat bun ai lam ni ding yang galaw nga ai hpe chye lu ai re.
Ndai laman Pyithutsit ni Lawnghkang, Mawsiza, Kate, grup yin ni de majan byin wa mai ai majaw, mung shawa yawng sadi maja let nga na lam, KIA the ni nawn ai Salang ni tsun sadi jaw da ai re.
