Monyin Ung San Mare hta KIA hte SSIA Pawng Hpawm Nna Shawng Ningnan Majan Shang
Monyin Balu Ginwang, Ung Tsan(အုန်းစံ) mare na Sam Hkyeng SNA Dap shara 3 kaw na, dap shara 2 hpe KIA SSIA pawng hpawm ni gasat zing la lu wa ai nga, KIA hte ni nawn ai ni tsun ai re.
Monyin Ung San mare hpe lai wa sai April 23 ya shana maga kaw na htim gasat ai gaw, hpang shani ngu na hta gasat zing la lu sai lam shawng lam hpyen magam gun hte ni nawn ai Salang langai KNG Shiga de n dai zawn tsun dan ai re.
“Dai maga de KIA PDF SSIA ni hpyen shamu ai gaw na sai, ya n dai laman Ung San Mare na SNA Dap shara ni hpe sa gap gasat ai ga rai nga ai, Dai mare kaw SNA shara 3 nga ai, 3 nga ai kaw na 2 hpe gaw a tsawm sha lu jasan kau da ma ai da,” nga tsun dan wa ai re.
Ung San mare hpe KIA hte SSIA dap maga na hpyen man lahkawng hte htim gasat wa ai majaw, SNA maga mare de laknak kaba hkrup mara bai gap shadam bun wa ai majaw, mung shawa dum n ta hkra hten ai lam ni nga wa ai hpe chye lu ai re.
Dai kaw shang lawm gasat ai SSIA ngu Shan State Indepentdent Army ngu ai ni rai nna, Myen hpyen dap daru magam zing kau ai hpang, Myen hpyen dap hpe gasat shamyit mayu ai Sam laknak lang rawt malan hpung ningnan langai re lam chye lu ai.
Dai Hpyen hpung ni gaw, SSPP daju Wan Hai kaw na lung wa ai Sam rawt malan hpung ni rai nna, Myen Hpyen hpe gasat shamyit ai lam hta KIA hte rau ta gindun let, Wanleng lam mayan de gasat hpang wa ai re lam chye lu ai.
SSIA dap ni Jinghpaw mung de du ai (2) ning jan na sai rai tim, n dai shawng ningnan lang KIA hte majan gasat wa ai lam re nga, ginra masha ni tsun ai re.
KIA hte pawng hpawm dap maga, Ung San mare na SNA dap hpe April 23 ya shana hkying 4 kaw na hkying 8 lapran kaw sa htim gasat zing la lu wa ai re nga, shawng lam magam gun hte ni nawn ai ni tsun ai re.
Monyin Hopin lam lapran na Namma mare makau na Nan Saw Law mare kaw majan byin taw ai shata lam rai sai nga ginra masha ni tsun ai re.
Ndai laman Myen Hpyen dap hte SNA ni pawng nna, KIA nga ai shara de hpyen shamu wa ai majaw, Wanleng lam grup yin de mung majan bai byin wa na masa lam a majaw, mung shawa ni myit tsang taw nga ai lam, Monyin ginra masha langai tsun ai re.
