Myen Shaning Ningnan Shani n tara rim sharen da ai, Mung Masa bawng masha ni hpe shalawt ai hta, Jinghpaw Mung, Monyin htawng hte Myitkyina htawng kaw na marai 17 hpe shalawt ya ai lam, (PPNM) sumtang hta tsun da ai kaw na chye lu ai.
Gumshem Myen Hpyen Asuya Min Aung Hlaing Gumsan magam lit hkam la ngut ai hpang, April 17 ya shani ang ai, Myen Shaning Ningnan shani bawng masha marai 4,335 hpe shalawt ya ai hta, Jinghpaw mung kata na bawng masha marai 95 shalawt ai kaw, n ta rim sharen da ai Mung masa bawng masha marai 17 lawm ai lam tsun da ai rai nga ai.
Bawng masha shalawt ai lam hta, Myitkyina htawng kaw na marai 66 the Monyin htawng na marai 29 hpe shalawt ya ai lam chye lu ai.
Manmaw, Putao, Hpakant htawng hkan na gade ram gara hku shalawt ai ngu lam hpe gaw, nlu sagawn ai nga, PPNM na lit nga ai amyu shayi langai KNG shiga de n dai zawn tsun dan da ai re.
“Hpakant htawng the Putao Htawng de gaw, anhte n dep mat ai, sagawn na matu mung yak mat ai, Jinghpaw mung madang hku nga yang, Myitkyina hte Monyin ram hpe sha dep hkap ai, Ya Manmaw htawng kaw nga yang mung, majan byin taw ai majaw, gara hku kaning zawn rai byin ai re hpa n chye mat sai,” nga tsun dan da ai re.
Myitkyina hte Monyin htawng kaw na shalawt dat ai htawng masha law malawng gaw, Kani Ya, lagu lagut manghkang ni hte rim sharen da hkrum ai ni hpe bai shalawt ya ai masa re nga, Monyin ginra masha ni tsun ai re.
Myen Shaning Ningnan shani bawng masha marai 4,335 hpe shalawt ai lam n dau ai rai tim, kaja tatut kaw lawt pru wa ai masha marai, 1,686 ram sha nga ai lam, (PPNM) a sumtang laika hta tang madun da ai re.
Dai shalawt dat ya ai hta, Mung masa bawng masha marai 292 shalawt ya ai hta, Gumsan Magam Win Myit hte rau NLD Party kaw na Salang n kau lawt pru wa ai lam mu lu ai re.
Hpawmi Aung San Su Kyi hpe shinggan bawng masha (အကျယ်ချူပ်) hku na htawt sit na lam tsun garu ai rai tim, dai ni ten du hkra laklai ai lam hpa n mu lu ai re.
