Panglong Ga Sadi A Majaw, KIO Rawt Malan wa ra ai sha n ga, Mungdan Kaw na Mungdaw Byin mat
Dai ni gaw, Myen Mung Bum nga amyu sha ni hte layang ga nga, Myen amyu sha ni yawng, Mung hpawm Mungdan langai jawm gaw de na ngu ai Munghpawm masat n htoi (ပြည်ထောင်စုနေ့) shani rai nga ai re.
Ndai ပြည်ထောင်စုနေ့ gaw, amyu baw sang yawng jawm shang lawm ai, Mung hpawm Mungdan langai byin tai na matu yaw shada let, Panglong ga sadi myit hkrum ta masat htu ai shani hpe masat ai lam mung rai nga ai.
Ndai Pang Long Gasadi kaw jawm Myit Hkrum ai lam ni hpe, dai ten na Mungdan a Asuya ni a majaw, KIO Rawt malan wa ai lam hte seng na Dukaba Sumlut Gun Maw gaw, Ameracan Texes Muklum kaw galaw ai (65)Ning Hpring Rawt Malan Masat Nhtoi shani tsun sang lang mat wa ai hta n dai zawn tsun da ai re.
“KIO Hpa majaw pru wa ai rai nga yang, Panglong Ga sadi kaw lawm ai lawng lam ni hte ga sadi ni hpe n mu masu su lai wa ai Mungdan a Asuya ni a majaw, Koloni lai ladat hpe matut hkap la hkan sa nna, amyu kaba lai len hte Up madu sha wa ai ngu hkam sha wa ai majaw, anhte Kachin ni KIO ngu ai Rawt malan Hpung byin pru wa ai re.”
Myen hte Pang Long Ga sadi lekmat htu ai hpang kaw na, tinang lu ging lu ang ai ahkaw ahkang ni hpe tat sum kau nna, Myen Mung kata rawt malan hpung law wa ai re nga, mung masa yu maram ai ni law law tsun madi madun lai wa sai re.
Dai Pang Long gasadi lekmat rai n htu shi ai ten, Jinghpaw Mungdaw gaw, Mungdan hku na nga ai rai tim, dai Pang Long gasadi lekmat sa htu ai hpang kaw na Mungdaw byin mat ai re lam, Sarama Kaba Uyen Sinwa Nhpan Ja Ra naw nga ai ten 2020 ning hta KNG sa du hkrum shaga ai ten, n dai zawn tsun da ai re.
“Panglong ga sadi jawm htu ga nga, dai kaw Panglong ga sadi lekmat jawm sa htu ai majaw, Mungdan kaw na Mungdaw byin mat ai re,”
Panglong ga sadi n grin ai kaw na, Myen mung rawt malan wuhpung law wa ai lam gaw dai ni ten du hkra rai nga ai re.
Myen Hpyen dap a amyu kaba lai len a majaw, shada daru magam zing hkat ai lam ni jahkring hkring byin ai majaw, Myen mung a rawt jat galu kaba lam gaw, krung hkaraw de di hkrat bang mat wa taw nga ai lam, Mung masa yu maram ai ni tsun madi madun da ai re.
