Hpakant Mashi Kahtawng Mung Shawa Dum n ta na Arung Arai Myen Hpyen Dap lagu Htaw La Taw Nga
Hpakant Mashi Kahtawng Mare na Mung Shawa dum n ta ni hpe Myen hpyen dap hkan adup hpaw na arung arai hkan lagu htaw la taw ai lam, ginra masha ni kaw na chye lu ai re.
Hpakant kaw majan gade laja wa ai rai tim, Sutgan dum nta ni hpe tawn da n gwi na, ngam taw ai hpyen yen mung shawa ni gaw, n dai laman Mashi Kahtawng grup yin de n bungli bawm jahkring hkring wa jahkrat bun wa ai majaw, asak shim lum lam a matu hkrit tsang na koi yen ai, lahkawng masum ya sha naw re ai hte ya na zawn hkan lagu htaw la taw ai lam ginra amyu shayi langai KNG de n dai zawn tsun dan wa ai re.
“Myen ni galoi na la taw kun n chye ai, Mung Shawa ni hprawng yen ai lahkawng ya nga hte n ta adup hpaw rai ni lagu htaw la rai taw nga masai, Mana gaw Ahkri Shawng ni na n ta kawng maga hte Uru Sengmaw Ginwang Ningtau Amu madu n ta hte Staff n inga ai n ta hkan na rai ni yawng lagu adup hpaw la kau masai Myen dai ni,” nga tsun dan wa ai re.
Hpakant Mashi Kahtawng mare masha ni gaw, 2024 kaw na majan byin wa ai rai tim, mai byin ai hku makau grup yin hkan koi yen na shalai ai rai tim, n dai laman gaw, Nbungli bawm grai wa jahkrat bun wa ai majaw, n dang hkam na tsan ai de hprawng yen sai lam matut tsun dan ai re.
Hpakant Seng Tawng, Gwi Hka ni de Majan laja lana byin ai ten, Hpakat Tatma kawng na laknak kaba laja lana gap bun wa tim, n hprawng yen ai sha nga taw ai mare ni n dai kalang gaw n dang hkam na hprawng ra mat sai lam matut chye lu ai.
Dai ni February 11 ya shana maga de Hkying 4:30 aten hta San Chyoi Mare Gawdin Pa Shawng na dum n ta langai kaw Laknak kaba si wa hkrat bun ai majaw, Mung Shawa dum n ta langai hten hkrum ai lam chye lu ai.
February 10 ya shani hta mung, Hpakant Mashi Kahtawng Kyuhpyi bum grup yin de nbungli bawm lahkawng lang wa jahkrat bun da ai lam chye lu .
Hpakant Jade Love Seng makau kaw Myen Balik ni jawn ai Mawdaw langai hpe KIA maga Bawm hkap kapaw ai majaw, Myen Balik maga si hkala ai lam nga wa ai hpe matut chye lu ai.
Hpakant ginra hta dai ni mung majan laja lana matut byin taw nga ai rai nna, Myen Hpyen Drone bawm n hkring n sa sa jahkrat bun taw ai lam ni mung nga ai hpe chye lu ai re.
Myen hpyen dap maga na Madang tsaw Drone langai hpe lai wa sai bat hta pawng hpawm dap ni gap jahkrat la lu wa ai lam nga ai re.
Dai drone gaw, madang tsaw, nbungjawng lawm ai Drone hpan rai nna, laknak kaba si ni hpe a tsawm sha shara shading na jahkrat ya lu ai Drone re lam chye lu ai.
