Myen Hpyen dap gaw, Rohingya amyu kaji ni hpe sat shamyit ai ngu mara hte Gambia Mungdan kaw na Myen Mung Asuya hpe Tara Jewat da ai lam the seng nna, Naytalan Mungdan, Dehag Muklum hta January 12 ya shani kaw na bai jep joi hpang taw sai re.
Ndai kalang gaw, amu mang hkang mabyin lam the seng nna, Mung Shawa yawng a man madat hkam la ai hpawng re lam matut chye lu ai.
Rohingya amyu kaji ni hpe sat shamyit hkrum ai ngu masa lam the seng nna, Myen Hpyen dap maga na gaw, ja ja jepat da ai re.
Gambia Mungdan maga na tara jewat da ai lam the seng nna, Myen Hpyen Asuya maga na, Maigan hkringmang ဦးကိုကိုလှိုင် hte တရားရေးဝန်ကြီး ဒေါ် သီတာဦး ni sa du shang lawm taw nga ai re.
Myen Hpyen Asuya maga na ra ai lam ni hpe Belgium Mungdan ဘရပ်ဆဲ muklum Myen Hpyen Maigan hkring mang rung kaw na ra ai lam ni hpe galaw taw nga ai lam tsun tawn ai re.
2019 ning hta Aferica Taik kaw na Mungdan kaji langai rai nga ai, Gambia Mungdan kaw na, Mungkan hta tsaw dik tara rung rai nga ai ICJ hta Myen Hpyen dap gaw, amyu kaji Rohinja ni hpe amyu htum sat shamyit ai lam galaw wa ai nga nna, tara jewat hpang wa ai rai nga ai.
Lai wa sai 2025 ning December 19 ya shani lahkawng maga na n gup ga hte shawk shawn da ai lam ni hpe 2026 January 12 kaw na 29 ya shani du hkra ICJ Tara rung na masam maram madat hkam la ai lam galaw mat na lam tsun n dau da ai re.
Shawng nnan madat masam maram ai lam hpe gaw, January 12 kaw na 15 ya shani du hkra Gambia Asuya maga na tsun hparan ai lam galaw mat wa na rai nna, January 16 kaw na 20 ya shani du hkra gaw, Mye mung maga na bai tsun ninghkap ai lam ni galaw mat na re lam chye lu ai.
Dai hpang, January 21 kaw na 23 ya shani du hkra gaw, Sakse sakgan ni hpe chinghka lam jep joi ai lam matut galaw mat na re lam chey lu ai.
Myen Mung Asuya hpe Gambia mungdan kaw na Tara jewat wa ai ten, 2019 ning NLD Asuya lakhtak ten, Mungdan hpaji jaw Hpawmi Aung San Su Kyi nan ICJ tara rung de sa nna, n dai lam hpe sa jeyang wa ai re.
2021 ning Myen Hpyen dap daru magam zing kau ai hpang kaw na gaw, ahkyak ai Myen Hpyen Du ni gadai n sa shang lawm ai sha, Mung shawa maga na Asuya hpung shang masha yan hpe hkrai dat ai hpe mu mada lu ai re.
