Hpakant Kala Jawng (Sut Ja Kawng) mare kaw laknak kaba wa hkrat ai majaw, Ma kaji marai 2 si nna, Mung Shawa marai 14 hkala
Hpakant Myen Hpyen Dap kawng makau na Kali Jawng (Sut Ja Kawng) mare kaw laknak kaba wa hkrat ai majaw, Ma kaji marai 2 si nna, Mung Shawa marai 14 hkala hkrum wa ai lam, Hpakant Ginra masha ni kaw na chye lu ai re.
Ndai laman Myen Hpyen dap ni Seng Tawng hpe bai lu la na matu Mashi Kahtawng Kyuhpyi bum maga de htim gasat wa ai kaw na majan bai byin taw ai lam chye lu ai.
Lai wa sai bat 5 ya shani kaw na, Hpakant Ginra hta Myen Hpyen dap the KIA Pawng hpawm daplapran majan laja lana bai gap gasat hkat wa ai gaw, dai ni ten du hkra re lam chye lu ai.
Myen Hpyen dap maga Mashi Kahtawng, Seng Tawng Mare dingsa lam hku na htim gasat yu ai masan n sa ai majaw, dai hpawt kaw na hpyen man bai gayin mat wa sai lam, Hpakant Ginra masha langai KNG de n dai zawn tsun dan wa ai re.
“Myen Hpyen man ni mana kaw na Sut Bum Hpungkyi Jawng maga de hpyen man bai gayin mat wa sai, n dai Seng Tawng Mare dingsa (ဆိုင်းတောင်ရွာဟောင်း) ထုံးဘို၊ Jam Gat hku htim gasat yu ai masan nsa na ya gaw, Hpakant Maza bum, Sut Bum mare maga hku bai gayin mat wa sai,” nga tsun dan wa ai re.
Dai hpawt manap kaw na Sharaw Hka, Lagat Kawng, San Chyoi, Sut Bum, maga de bai gap gasat hkat wa ai hpang, gadai gara wuhpung na gap dat ai laknak kaba re n chye ai, laknak kaba si Kala Jawng (Sut Ja Kawng) mare kaw wa hkrat ai majaw, Ma kaji lahkawng si nna, marai 13 hkala hkrum wa ai lam, ginra amyu shayi langai n dai zawn tsun dan wa ai re.
“Dai hpawt maga kaw na gaw, Sharaw Hka အမှိုက်ပုံ maga de bai gasat hkat wa ai da. Tatma Kawng the yep re Kala Jawng mare kaw laknak kaba wa hkrat na mung shawa si hkala lam bai byin wa ai, Ma 2 si na, marai 14 hkala ai da, Myen Hpyen dap makau kaw wa hkrat kapaw ai masa hpe yu yang, anhte maga na ni gap dat ai laknak kaba rai na masa nga ai,” nga tsun dan wa ai re.
Ndai laman Myen Hpyen dap ni Hpakant Mashi Kahtawng Kyuhpyi bum de htim gasat sa wa ai hta, Myen Hpyen dap hte Pyithutsit dap maga si hkala ai lam nga wa ai hpang, Myen Hpyen dap Hk.M.Y (381) dap na Hpyen La marai 6 laknak hte asum jaw shang wa ai lam chye lu ai re.
Mani Hpawt Hkying 9 chyen ten daram hta mung Hpakant Myen Hpyen Tatma kawng makau na Hpakant lahta tsang jawng kaw, laknak kaba wa hkrat bun ai majaw, jawngma lahkawng hkala hkrum wa ai re.
Ndai laman Hpakant Ginra de Myen Hpyen dap ni hpyen shamu shamawt ai lam ni bai galaw wa ai majaw, Majan bai laja wa na masa nga ai nga, Hpakant ginra masha ni tsun ai re.
