Nawng Lut Ginra de ndai laman Myen hpyen dap hte Pyithutsit maga Hpyen n gun kaba the ding yang na htu shadut htim gasat lung wa ai majaw, KIA Dung 26 ginra na shawng lam dap shara, Sanun Kung, In Tha mare na dap shara hpe gan yen kau da ya sai lam shawng lam hpyen magam gun the ni nawn ai ni kaw na chye lu ai.
Ndai laman Myen hpyen dap hte Pyithutsit ni pawng hpawm nna, Hpyen n-gun kaba hte ladu lai htim gasat wa ai majaw, shawng lam dap shara langai hpe Mani June praw 5 ya shani gan yen kau da ya ra mat ai nga, shawng lam hpyen magam gun hte ni nawn ai ni KNG de ndai zawn tsun dan wa ai re.
“ Sanun Kung, In Tha kaw majan byin taw ai na sai, anhte maga na mung mai byin dang di a daram hkap shingla gasat yu ai, rai tim, laknak n gun, hpyen n gun n bung ai majaw gan yen kau da ya ra mat ai ga rai nga ai.” Nga tsun ai re.
Sanun Kung mare de lai wa sai Shata kaw na Myen hpyen dap hte Sam Hkyeng Pyithutsit ni pawng hpawm na htim gasat lung wa ai hta KIA PDF dap maga na hkap shingla gasat dat ai hta, Sam Hkyen Pyithutsit maga na, Ningbaw ngu na Ko Tsai nga wa hte hpawn marai 8 Si hkrum ai hpang bai thing nut mat ai rai nga ai.
Dai hpang kaw na Myen hpyen dap hte Sam Hkyeng Pyithutsit ni gaw, ang yang ang ai hku shani shagu hpyen shamu shamawt htim gasat taw nga ai, ya Shata mi jan na wa sai mung rai nga ai.
Sanun Kung na yen mat wa ai KIA hte PDF pawng hpawm dap nig aw Hepa mare maga de yen mat wa ai lam chye lu ai.
Myen hpyen dap the Pyithutsit ni gaw, Indaw nawng a sinpraw lam maga Na Mawn, Sanun Kung, Hepu, Hepa, Nan Mauk Gam, Lung Zang, Chaung Wa, Nyaung Pin lam maga hku htu shadut htim gasat lung wa nna, KIA ni htim gasat zing madu da ai, Chaung Wa, Nyaung Pin mare na dap shara ni hpe bai lu la hkra htim gasat lung wa ai masa re lam ginra masha ni tsun maram da ai re.
Dai lam maga hku htim gasat lung wa nna, Chaung Wa, Nyaung Pin dap shara ni hpe htim gasat zing madu la ngut ai hpang gaw, Hpakant Gwi Hka de apyaw sha hkrang pru lu ai lam mung rai nga ai.
Kamaing lam maga hku na htu lung wa ai Myen hpyen hpung ni Hpakant du lung mat wa ai hpang, Nawng Lut maga hku na htu lung wa ai Myen Hpyen hpung ni mung n dai laman n gun dat bai htim gasat wa ai lam mung rai nga ai.
Myen hpyen dap gaw, Hpakant ginra na shan hte tat sum kau da ai shara ni hpe bai madu lu na matu, Hpakant ginra de Hpyen man masum hku na htu shadut htim gasat taw ai mung rai nga ai.
Nawng Lut Maga hku na lung wa ai Myen hpyen hpung ni gaw, dai ni ten du hkra Sanun Kung mare sha naw du lu ai re majaw gaw, Gwi Hka de du hkra htim gasat lung wa na matu gaw matut na naw yak na re nga, ginra masha ni tsun maram da ai re.
