KIA dap maga numdaw kalang bai htim gasat wa ai majaw, Manmaw Majan laja lana matut gap gasat hkat nga

Manmaw, Maje htim shagrawt majan hpe dai hpawt manap hkying 5 daram kaw na numdaw kalang bai laja lana htim gasat taw nga ai lam, shawng lam magam gun hte ni nawn ai ni  tsun ai re.

Manmaw mare kaba hpe lai wa sai December praw 4 ya shani kaw na htim gasat hpang wa ai gaw, shani shagu laknak kaba hte gap gasat hkat nga ai kaw na, dai hpawt manap gaw hpyen n’gun kaba the numdaw kalang bai htu shadut htim gasat wa ai hta, Myen hpyen dap maga na mung, nbungli the laja lana shingla gasat hkat ai lam ni a majaw majan laja lana gasat hkat taw nga ai re.

”Shani shagu laknak kaba the gap gasat hkat taw nga ai kaw na, dai hpawt gaw numdaw kalang hku na n’gun bai gahkyin la na, bungli bai shang ai ga rai nga ai, ram ram  masan sa ai nga na gaw tsun ai, Myen hpyen dap maga na mung nbungli the agying ninghkap gasat ai ga rai nga ai, dai hpawt gaw mungkan majan byin ai zawn she nga ai,” nga Shawng lam magam gun the ni nawn ai ni KNG de tsun dan wa ai re.

Dai hpawt manap jau aten kaw na Manmaw Myen hpyen dap Hk.L.Y (47) dap the Ts.K.Hk 21 dap ni hta man pa htim gasat hkat taw ai re lam chye lu ai.

Manmaw mare kaba hta Myen hpyen dap ni kaw na mung shawa wundek dum nta hte Hotel n tsa ni hkan shara la na ninghkap shingla gasat taw nga ai re lam shawng lam hpyen shi sawk ni tsun ai re.

Ya ten Manmaw mare kaba shara law malawng hta KIA pawng hpawm dap ni shara zing madu da lu sai rai tim, Mali Hka kau maga de Myen hpyen dap kaba ni matut naw ngam taw ai majaw majan laja taw nga ai re.

Majan laja lana gap gasat hkat taw ai hta, Myen hpyen dap maga na nbungli hte lani mi yawm dik 8 lang da bat wa htim gap gasat ai lam ni a majaw, Manmaw mare law malawng yawng hten za hkrum taw nga sai re.

Manmaw majan hta Myen hpyen dap maga na sum machyi lam ni law nga ai majaw, Jet Fighter 4, Y12 nbungli 2 hte, bawm wa sharu bun nga ai nga, shawng lam magam gun ni tsun ai re.

Dai hpawt na majan hta mung shawa si hkala ai lam ni nga wa ai rai tim, Phone matut mahkai yak ai majaw kata lam a tsawm tup hkrak hpe rai n chye lu shi ai re.

Ndai lam the seng na KIA Shiga magam dap lithkam Dukaba Nhpang Naw Bu hpe Ph set san yu ai rai tim, Phone n hta ai re.