Waimaw de Majan byin ai lam n nga tim, Nbungli the sa gap, Laknak kaba the mung hkrup mara gap bun

Majan byin ai lam n nga tim, Myen hpyen dap maga Waimaw Wuyan Mukchyik Nam Wah re ni hta nbunngli the wa gap bun ai nga ginra masha ni tsun ai re.

November 24 ya shana maga hkying 4 ram aten hta Y-12 nbungli the bawm wa jahkrat bun ai majaw, Nam Wah mare na mung shawa langai hkala hkrum nna, dum n’ta 3 ram mung hten mat ai nga tsun dan wa ai re.

“Mana de Nam Wah mare kaw nbungli bawm 7 daram wa jahkrat bun ai, n’ta 3 yawng hten mat na, mung shawa langai bawm hkyep hkra na hkala ai, grai wa tsang ra hkra gaw n re, Waimaw (58) dap kaw na mung, laknak kaba hte mung bai gap bun ai, kaning re shiga na ma ai kun?”nga ginra masha langai KNG de tsun dan ai re.

Ya ten Waimaw ginwang kata majan byin ai lam n nga ai rai tim, Myen hpyen dap maga, Kanpaiti mare hpe tat sum kau ai hpang, Waimaw ginwang kata de ya na zawn nbungli bawm, laknak kaba ni majoi hkrup mara gap bun wa ai masa re nga ginra mash ani tsun maram da ai re.

Dai zawn nbungli hte shawng sa gap ngut ai hpang shana hkying 10 ram kaw na Waimaw Myen hpyen dap (58) kaw na Sinat kaji kaba ni hte makau grup yin de hkrup mara gap shadam bun wa ai re.

Laknak kaba gap ai n sen Myitkyina kaw na mung adan sha na lu ai nga Myitkyina ginra masha ni tsun ai re.

“Mana sinat n sen grai bai ngoi ai, Waimaw de rai sam ai, anhte gaw hpa Phone line mung n lu ai re majaw gara de hpa byin wa ai mung n chye,” nga tsun ai re.

Kanpaiti hpe KIA htim gasat zing madu kau ai hpang, Miwa langu htaw maw daw ni Miwa mung de ding yang matut shang taw ai rai tim, Miwa hkran maga de na gunrai htaw mawdaw ni hpe tsep kawp n shapru ya ai re.

Miwa maga de nay a na zawn gunrai htaw mawdaw n shapraw ya ai hte seng nna, Miwa the Wunpawng Mungdan Shanglawt Asuya lapran hpaga gunrai shalai na the seng nna, Shagyeng hkat taw ai masa byin taw ai re.