Nmawk maga de htu shadut lung wa nga ai Myen Hpyen hpung the KIA dap lapran shani shagu majan laja lana gap gasat hkat taw nga ai re.
Manmaw kaw na, Nmawk maga de htu shadut htim gasat wa ai hpe ninghkap shingla gasat taw nga ai KIA pawng hpawm dap ni hkap nga ai shara hpe Myen hpyen dap maga mani November 24 ya shani hta mung nbungli the laja lana sa gap bun ai nga shawng lam magam gun the ni nawn ai ni tsun ai re.
KIA the pawng hpawm dap maga na mung Deng 6 hte Deng 7 shara ni hta kring mading shara jahkrat nna hkap shingla gasat nga ai hta, Myen hpyen dap maga hpri gang mawdaw, nbungli, Drone hpan hkum hte htim gasat nga ai hpe KIA shingla gasat taw nga ai re.
Myen hpyen dap maga na mung, Nmawk hpe bai n lu n mai htim gasat taw nga ai masa re nga hpyen masa yu maram ai ni tsun ai re.
“Myen ni gaw Nmawk mare hpe n lu la n mai htim gasat taw ai ga rai nga ai, hpa majaw nga yang Nmawk gaw Miwa jarit a matu mung ahkyak ai zawn, Manmaw muklum shim lam a matu grai ahkyak ai shara re, lama Nmawk hpe tat kau sai nga yang Shanglawt a matu ginjaw hte Loi Je jarit zawn re ni n shim mat sai. Dai majaw shan the mung n lu n da shakut taw ai zawn KIA maga mung ninghkap tik tik re ga rai nga ai,” nga hpyen masa yu maram ai ni tsun da ai re.
Nmawk mare kaba hpe KIA dap maga lai wa sai August 29 ya shani htim gasat zing madu kau ngut ai hpang bat mi jan na ai hte Myen hpyen dap maga hpyen n’gun 400 ram the bai htu shadut taw nga ai gaw dai ni du hkra rai nga ai.
