Zahkung Ting Ying Up hkang ginra, Phimaw mare kaba makau grup yin hta, KIA maga htu shadut htim gasat wa ai majaw, Majan laja lana gap gasat hkat taw nga ai lam ginra masha ni tsun ai re.
Dai ginra de mani hpawt kaw na gap gasat hpang wa ai gaw, dai ni October 31 ya shanni hta Lawu Lung Bam mare hte Lahta Lung Bam mare ni hpe htim gasat la lu sai nga, shawng lam magam gun hte ni nawn ai ni kaw na chye lu ai.
Ya majan byin nga ai shara gaw, Phimaw makau grup hta rai nna, BGF masat (1001) dap dung daju hte Deng 2 daram sha tsan ai shara ni hta gap gasat hkat taw nga ai re.
“Mana shana n sin sin wa ten kaw na Sinat nsen ngoi hpang wa ai, Majan byin wa ai masa re ga rai nga ai, dai hpawt manap gaw BGF dap na Myen hpyen la hte BGF hpyen la ni Kang Fang maga de hprawng ai rai sam ai, Nlung hpraw htaw mawsaw kaba ni hte yen lai mat wa ma ai, Phimaw mare na mung shawa ni mung hkrit nna, Miwa hkran maga de hprawng yen magang ma masai,” nga Hpi Maw mare na mung shawa langai KNG shiga dap de tsun dan wa ai re.
Phimaw majan masa lam hte seng nna, KIA Shiga mgam Dap lithkam Dukaba Nhpang Naw Bu hpe san yu yang, shi hku na dai ginra de na hpyen masa lam hte seng na, hpa nga rai nna shi ai lam tsun ai re.
Ya majan gap gasat nga ai shara gaw BGF dap dung daju nga ai Na Zung Bawm mare hte Phimaw mare lapran kaw rai nna, Phimaw hte BGF Dap Dung shara gaw Deng 10 jan tsan ai shara rai nna, Sengke hte hkying hkum mi jan jawn ra ai shara re lam chye lu ai.
Ya ten dai ginra na hpyen masa lam gaw, KIA dap maga BGF masat (1001) hpe htim gasat zing na matu hkyen taw nga ai masa re lam hpyen masa yu maram ai ni tsun ai re.
“Daihpawt gap gasat hkat ai gaw (1001) rai n du shi ai, Lawu Lung bam hte lahta lung bam mare ni hpe shakri ai, dai na maga gaw yawng lu sai ga rai nga ai, ya naw ngam ai BGF (1001) hpe shakri na rai nga ai, nga tsun ai re.
Pangwa Lu Pyi BGF Masat (1002) hpe October 15 ya shani htim gasat zing kau nna, Sin Chyai mare na BGF Masat (1003) hpe October 28 ya shani htim gasat zing madu kau ngut na, ya hpang jahtum matut naw ngam taw ai Phimaw Nazung Bawm Mare na BGF (1001) hpe htim gasat taw nga ai re.
Ya ten Miwa Asuya maga de na, Myen Miwa jarit chying hka kaba yawng hpe pat kau ai rai tim, Phimaw mare na jarit chyinghka hpe matut naw hpaw da nna, Miwa Company maga na Nlung hpraw htaw ai mawdaw kaba ni ding yang naw lai taw nga ai re.
Chihpwi Pang Wa maga de KIA dap maga na lai wa sai September shata htum maga na dai ginra de na shara law law hpe htim gasat zing madu wa sai rai nna, ya matut naw ngam taw ai, BGF masat (1001) hpe htim shagrawt kau na matu gap gasat hkat taw nga ai re.
