Hpakant Seng Tawng mare hpe yawng jasan kau ngut lu sai majaw, Padang dip magum byu akyuhpyi la ai lamang hpe October 22 ya shani Hpakant KIA masat Dapdung (6) hta galaw wa ai lam chye lu ai.
“Dai ni gaw Dung (6) kaw Sengtawng lu zing lu jasan ai magum bum kyuhpyi hpawng lamang galaw ai,” nga KIA the ni nawn ai Salang ni tsun ai re.
Seng Tawng majan byin wa ai lam gaw, lai wa sai September praw hta KIA dap ni nga ai, Lung Sai Kawng hte Kawa Bum maga de Myen hpyen hpung ni htu shadut shang wa ai hpe KIA dap maga bai hkap shingla gasat dat ai majaw, dai Myen hpyen hpung ni Lucky Men Hotel hta wa du shang rawng mat ai majaw, Seng Tawng Majan nhtoi shata mi jan na gasat hkat wa ai re.
September praw 4 kaw na October praw 9 ya shani du hkra gap gasat hkat wa ai hta, mung shawa marai 16 si nna, marai 38 hkala hkrum wa sai rai nna, Mung shawa dum n’ta nat jahten kau hkrum ai 175, Laknak kaba nbungli bawm hte hten mat ai dum nta 68, Kani ya the lagut ni lagu tawk jahten kau ya ai dun n’ta 30 re, lam KIA Shiga lawk hta tsun da ai re.
Sengtawng majan hta lahkawng maga si hkala lam nga wa nna, Myen hpyen dap maga na laknak machyu pala alaw alam padang dip zing madu la lu wa ai re.
Dai zawn padang dip zing la lu ai chyeju shakawn kyuhpyi hpawng lamang hpe KIA masat dap dung 6 hta mani galaw la lu was ai re.
