SinChyai Jarit sin Dap hpe hkying hkum mi jan hte sha htim shagrawt kau lu
Sadung hte Kanpaiti lapran na masat (1003) Sin Chyai Jarit Sin Dap kaba hpe Wunpawng Mungdan Shanglawt Hpyen Dap KIA the pawng hpawm dap maga na htim gasat zing madu kau lu sai lam chye lu ai.
Sin Chyai Jarit sin dap kaba hpe October 21 ya shana maga hkying 5 daram hta htim gasat zing madu kau lu ai nga, Dukaba Naw Bu KNG shiga dap de tsun dan ai re.
“Daina maga de hkying 5 kaw yawng zep zi lu zing kau sai,” nga tsun ai re.
Pang wa mare kaba hpe htim gasat zing madu kau ngut ai hte rau, Kanpaiti lam kaba maga de bai htu shadut htim gasat wa ai gaw, makau grup yin na dap kaji ni hpe n htoi 5 ya laman htim gasat zing kau ngut ai hpang, Sin Chyai jarit Sin dap kaba hpe hkying hkum mi jan hte sha htim gasat shagrawt kau lu ai re lam shawng lam magam gun the ni nawn ai ni tsun ai re.
“Jarit Sin Dap kaw na hpyen la ni Kanpaiti de hprawng yen ma ai majaw jahkring sha hte lu ai masa rai nga ai, dai hpe rai n gap shi yang Dumbang hka hku the Waw Hkyung mare hkan na dap kaji ni hpe shawng gasat kau ai ga rai nga ai, dai ni yawng hpe jasan ngut ai hpang Sin Chyai Dap kaba hpe mana de hkying 4 daram kaw na gasat hpang ai, hkying 5 kaw yawng lu shang sai gaw,”nga ginra masha the ni nawn ai ni KNG de tsun ai re.
Sin Chyai the Pangwa kaw na hprawng pru wa ai, Myen hpyen hpung n kau the Pyithutsit ni Kanpaiti mare de hprawng bang mat ai majaw, ya ten Kanpaiti mare hta hpyen masa matut shaja hkat taw nga ai re.
Kanpaiti mare kata Myen hpyen byuha dap kaba naw matut ngam taw ai rai nna, dai dap shara hpe matut naw jasan ra ai nga, shawng lam magam gun ni tsun ai re.
Kanpaiti mare hta jarit chyinghka matut hpaw taw nga nna, gunrai pru shang lam ni ding yang naw nga taw ai hte, Myen mung maga na Langu htaw mawdaw ni ding yang matut naw lai taw nga ai nga, mawdaw la ni tsun ai re.
Masat (1003) jarit sin dap hpe htim gasat zing madu kau ngut ai hpang, dai shana jang Myen hpyen dap maga, Sadung the Ginjaw Ginra makau grup yin ni de nbungli wa du pyen gayin kau da ai lam chye lu ai.
