Jarit Sin Dap 3 nga ai kaw na Lu Pyi mare na Jarit Sin Dap kaba langai hpe KIA Gasat Zing Madu
Zahkung Ting Ying woi ai, Lu Pyi mare na masat (1002) jarit sin dap hpe Wunpawng Mungdan Shanglawt Hpyendap KIA maga dai na de hkying 12:45 Pm ten hta yawng htim gasat zing madu kau lu sai nga Dukaba Nhpang Naw Bu tsun ai re.
Lu Pyi mare na, Jarit sin dap hpe lai wa sai October 10 ya shani kaw na, htim gasat wa ai hta dai ni October 15 Ya shani zep zi htim gasat zing kau lu sai re.
Myen hpyen dap maga na mung Lu Pyi mare hpe n-tat sum hkra, shani shagu ngu na Y-12 nbungli hte sa gap bun ai nga, ginra masha langai KNG shiga dap de tsun dan ai re.
“BGF dap hpe n tat hkra shani shagu Y-12 nbungli langai hte ding yang sa gayin gap ai, lani mi hta yawm dik 30 lang jan sa gap bun ai,” nga tsun dan wa ai re.
Lu Pyi mare gaw, Pang Wa mare hte Deng 10 daram sha tsan ai rai nna, Zahkung Ting Ying a NDAK a ginjaw hte ni dik ai shara rai nna, Pangwa mare a matu a hkyak dik dap shara rai nga ai.
Ya ten Pangwa mare hpe sin ai Myen hpyen byuha dap kaba langai sha ngam sai rai nna, matut na dai dap shara hpe htim gasat zing madu kau ai rai yang, Pangwa mare yawng hpe zing lu sana re lam chye lu ai.
Matut na rai tim, Pangwa Miwa hkran maga de, Miwa hpyen maga na, dip n’gun jaw ai masa hte hpyen n’gun jahkrat da nna, laknak kaba gap shadam bun ai lam ni galaw taw nga ai nga, shawng lam magam gun ni tsun ai re.
Zahkung Ting Ying woi awn ai BGF masat (1001) hpe, Phimaw mare lawu Nazung Bawm mare hta dap jung shara jahkrat da nna, BGF masat (1002) hpe Lu Pyi mare hta dap jung da nna, Masat (1003 ) hpe Kanpaiti makau Sin Chyai mare hta dap jung shara jahkrat da ai rai nga ai.
Ya ten dai ginra ni hta hpyen masa matut shaja hkat taw nga ai majaw mung shawa yawng mung sadi maja na nga na lam Du Kaba Nhpang Naw Bu tsun sadi jaw da ai re.
