Chihpwi mare de Myen hpyen nbungli bawm wa jahkrat bun ai majaw, COC nawku hpung na Hpungtau langai asak si hkrum ai lam chye lu ai.
October praw 3 ya shana hkying 9 chyen aten daram hta Myen hpyen Jet Fighter n bungli langai hte bawm wa jahkrat bun wa ai hta asak si sum wa ai re lam Chihpwi Ginra masha langai KNG shiga dap de tsun dan wa ai re.
“N’ta kaw wa hkrat bun na si ai gaw n rai nga ai, nbungli lung wa sai nga majaw hprawng yen ai ten, dai hprawng yen ai lam lapran kaw nan wa hkrat hkra na dai kaw nan si mat ai nga,” Chihpwi mare na mung shawa langai tsun dan wa ai re.”
Dai n bungli bawm hte si ai hpungtau gaw asak 40 ning ram re ai, Chihpwi COC nawku hpung na hpungtau langai rai nna, Lisu baw sang re lam chye lu ai
October praw 3 ya shana hta Myen hpyen dap maga na nbungli bawm 4 wa jahkrap bun ai hta 2 gaw Chihpwi mare Qid Law lawk hpaji jawng makau hta wa hkrat kapaw nna, hpaji jawng n kau hkra hten nna, ngam ai 2 gaw Nmai Hka htaaw ra hkran maga de wa hkrat ang ai nga tsun dan ai re.
Chihpwi mare kaba hpe KIA dap maga September 29 ya shani htim gasat zing madu kau ngut ai hpang shani shagu n bungli hte kalang wa gap bun taw nga ai re hpe matut chye lu ai .
Myen hpyen dap maga na ya na zawn nbungli hte shani shagu wa gap bun nga ai lam gaw, mung shawa ni hkrit mat nna, mare de n gwi wa hkra hte KIO n lu uphkang hkra galaw taw nga ai masa re lam ginra masha ni tsun maram nga ma ai re,
“Sinat mahku n’sen n ngoi ai 3,4 ya ram rai sai, rai tim shana shagu nbungli hte wa gap taw nga ai, ya mung shawa ni gaw dai nbungli hpe sha hkrit tsang ra taw nga ai, ngut na mung KIO maga n lu uphkang hkra galaw nna, muklum mare ni yawng hten za mat hkra galaw taw nga ai ngu maram lu ai,” nga tsun ai.
Chihpwi mare hpe htim gasat ai shani hta mung, Myen hpyen dap maga nbungli hte wa gap bun ai majaw asak 15 ning re ai Jawng Numlangai asak si sum wa sai re.
Chihpwi mare hpe htim gasat zing madu kau ai n htoi 4 ya du sai rai tim Myen hpyen dap maga n bungli hte shani shagu wa gap bun nga ai re.
Chihpwi mare hpe htim gasat zing madu kau ngut ai hpang mung shawa n kau mare de shang wa sai rai tim ndai laman n bungli hte shani shagu wa gap ai majaw kalang bai hprawng yen taw sai re.
Ya ten Pang Wa maga de na BGF hpyen hpung ni Chihpwi lam maga yu wa nna, Chihpwi Myen hpyen dap na hprawng pru wa ai ni hte pawng mat nna, shani shagu majan matut byin nga ai lam chye lu ai re.
