Chihpwi kaw na Pang Wa de lung wa ai Deng 11 Shagyit post hpe KIA htim gasat zing madu

Chihpwi kaw na Pang Wa de lung wa ai Deng 11 Shagyit post hpe KIA dap maga dai hpawt hkying 10 ten daram hta  htim gasat zing madu kau sai lam shawng lam hpyen shi sawk ni  tsun ai kaw na chye lu ai.

Dai hpawt bai htim gasat zing madu la lu ai dap shara gaw, Myen hpyendap hte Pyithutsit hpung ni pawm hpawm nna, dap jung da ai, shagyit shara langai rai nna, dai shagyit hta hkrun lam hkawm mung masha ni hpe laja lana sawk jep ai shara re lam shawnglam hpyen shi sawk ni tsun dan ai re.

KIA pawm hpawm dap maga na, ndai bat laman hta sha, Pyitutsit hte BGF ni madung uphkang tawn ai , Chihpwi hte Sawlaw mare kaba ni hpe zing madu la wa ai zawn, Myen hpyendap hte pyitutsit hpung ni a dap kaji kaba n law htum dap shara  10 jan hpe zing madu la wa sai re.

Chihpwi Saw Law mare kaba ni hpe htim shagrawt ngut ai hpang Pang Wa maga de bai hpyen man yawng wa ai masa re nga, hpyen masa yu maram ai ni tsun ai re.