Chihpwi Mare masha ni Nbungli matut maja ra taw ai majaw mare de rai n gwi n htang wa shi

Chihpwi mare kaba hpe KIA dap maga htim gasat zing madu kau ai hpang Majan gap gasat hkat ai lam n nga sai rai tim Myen hpyen dap nbungli bawm hpe naw hkrit ra taw ai majaw mung shawa ni mare de rai n gwi n htang wa shi ai majaw, nam kata matut hprawng yen taw nga ra ai nna, tsi mawan malu masha garum ningtum ra taw nga ai lam chye lu ai.

Chihpwi mare kaba hpe KIA dap maga September 29 ya shani htim gasat zing madu kau nna Myen Asuya hte seng ai  Rung ni yawng hpe pat zing kau nna gap hkat hkring taw ai n htoi 2 ya rai sai lam chye lu ai.

Myen hpyen dap maga na gaw September 29 ya shana hta kalang October praw 1 ya shana hta kalang shani kalang nbungli the bawm wa jahkrat bun ai nga ginra masha ni tsun ai re.

“gap hkat ai lam gaw n nga sai, nbungli n sa jang gaw dum n’ta de bai mai wa nga sai, rai tim nbungli naw maja ra ai majaw n-gwi wa ai, mani shani ka-ang mung nbungli hte naw wa gap ai.” nga ginra masha langai tsun ai re.

September 29 ya shani majan laja taw nga ai ten laknak kaba si a majaw, mung shawa marai 1 si nna marai 3 hkala hkrun wa ai re.

Ya ten Chihpwi mare mung shawa ni gaw makau grup yin na nam kata de hprawng yen taw nga nna, n kau lam lapran pat hkrum taw nga ai lam chye lu ai.

Majan byin ai hpang Chihpwi mare pru shang lam ni yawng hpe KIA dap maga pat kau ai re. Ya na zawn lam pat kau ai majaw mung shawa n kau lam lapran pat hkrum taw nga ai re.

“ Ya gaw Myitkyina yu mung n mai, Pangwa de mung lung n mai, lam lapran kaw pat hkrum taw nga ai, mai byin yang jahkring gan hpaw ya na hpe hpyi shawn mayu ai,” nga tsun ai re.

Chihpwi mare kaba gaw, Myitkyina hte Deng 88 tsan ai rai nna, Pang Wa mare hte deng 40 tsan ai mare re lam chye lu ai. lai wa sai 2011 majan kaw na Chihpwi mare makau grup yin na mung shawa ni Chihpwi mare kata sa hprawng yen taw nga ai gaw ya kalang bai yen ra taw ngai ai re.

Chihpwi mare kata hta ginra masha hte hpyen yen mung shawa yawng pawng 23,000 daram nga ai mare kaba langai re lam chye lu ai.

Dai ning March shata kaw na hpang wa ai KIA a htim shagrawt majan hta, lai wa sai bat kaw na, Zahkung Ting Ying woi awn up hkang nga ai, Chihpwi Saw Law ginra ni de mung htim shagrawt gasat wa ai rai nga ai.