Htai mungdan dingdung daw, Chiangmai hta Kachin dakkasu jawng ma zinlum hpung Kachin University Student Association (KUSA) ngu ai wuhpung hpe Chiangmai hta nga ai dakkasu jawngma ni hpaw dat sai re.
Ndai wuhpung hpe Chiangmai hta nga ai dakkasu jan mau gup ngut sai Senior jawngma ni hte Chiangmai kata na Rajabhat, Payap, Chiangmai, Maejo hte Mae Fah Lung zawng dakkasu jawng 5 na Jinghpaw jawngma ni hku nna 2024 April shata hta tara shang hpaw shabawn dat ai re.
“ndai wuhpung wuhpawng gaw ramma ni jawng ma ni yawng jawm hpawm di na hpaw taw da ai rai nga ai anhte ndai kaw na ma ya na zawn langai the langai kachin myu sha ni shada pawn ba hkat let du wa na aten ni hta grau rai nna anhte myu sha ni a lam yen ni shakut wa ai mi rai rai anhte mungdan ni galu kaba lam hta shakut wa ai hta maga mi de na contribute shang lawm lu na matu ndai wuhpung hpe galaw wa ai hku re nga” nga KUSA Amu Madu shayi Maran Htu Nan gaw KNG hpe tsun ai re.
KUSA mu gun ningnan ni woi awn ai hte shawng ningnan lang na Fresher Welcome lamang hpe, Chiangmai PAYAP Dakkasu hta lai wa sai September 14 ya shani galaw mat wa sai re.
Dai lamang hta Wupawng sumpi dum ai lam, htung hking ka hkrang, hte mahkawn lamang ni hte galaw wa ai re.
Hpaji sharin ai dakkasu jawng ma ni lapran shada gahkyin gumdin, mayak jawm hparan luhkra, Htai mungdan Chiangmai hta jawng lung nga ai jinghpaw ramma ni hku nna Kachin Dakkasu Jawngma Zinlum Hpung-Kachin University Students Association (KUSA) ngu ai wuhpung hpe hpaw dat ai lam re ai nga KUSA a ninghpaw shadang Lakum Brang Lat gaw ya na zawn tsun ai re.
“ya gaw anhte yawng chye ai the maren myen mungdan kanu mungdan hta hpyen majan tsinyam hpe hkrum sha nga ai anhte sha nre mungdan ting kaw nga ai yawng dai hta anhte hpaji shakut nga ai ramma ni hku nna gaw grau nna kanu kawa the ramma ni hpe ngun jaw mayu ai chyawm gaw anhte hpaji lam hta hpaji lam hta hpaji the myu hpe shalawt ngu the maren hpaji hpe matut manoi shakut let anhte chye da ai hpaji hpe matut manoi bai ap nawng dawjau na matu anhte ni myit sa da ga ai”ngu nna shi gaw tsun ga ai.
KUSA hku na ya galaw taw ai magam bungli ni gaw dakkasu 5 kaw na jawng ma ni langai the langai madi shadaw hpawn ba hkat chye wa na matu ganawn mazum ai lam ni, nta kaw na gumhpraw the jawng lung taw ai raitim yak wa ai ten jawng hkring ra mat ai lam ni nbyin hkra gunhpraw hkoi ya ai lam ni galaw ya ai mung rai nga ai.
Bai nna jawng ma ni hpe hpaji lam hta aten galu madi shadaw lu na matu wuhpung nkau the matut mahkai nna alu ja gumhpraw tam ai lam ni the tinang hta nga ai atsam ni grau rawt jet wa hkra galaw lu na matu ma shakut shaja nga ma ai lam chye lu ai.
“ngai hku na tsun mayu ai chyawm gaw anhte gaw grau nna jawng ma ni hpe zinglum ai hta n gun dat ra ai bai nna Chiangmai muklung hta hpaji sharin sa wa n ani hpe mung ta gin dun ra ai. Grau nna gaw jawngma wuhpung langai hku na kanu mungdan hta nlu galaw ai ni hpe ndai shara hta shang tsap let galaw gin ai ngu, ngai hku na tsun mayu ai chyawm gaw anhte na wuhpung gaw ya she gawgap ai re majaw ra rawng ai lam nig rai law ai dai majaw nu w ani hku na mung madi shadaw hpawn ba la ya rit ngu hpyi lajin mayu ga ai” nga KUSA wuhpung byin wa ai hta shang lawm ai Senior Jawng ma Shadang Sumlut Sengli gaw tsun ai re.
KUSA ni hku na mung du wa na shawng lam hta Chiangmai kata na ramma ni hpe gahkin gumdin ganawn mazum ai lam ni sha n ga garum shingtau ai lam ni the hpaji lam yen ni hta mahkrum tam ya ai lam ni hpe galaw sa mat na lam chye lu ai re.
Dai sha n ga myu sha lam yen ni hta mung grau nna galu kaba rawt jet wa hkra hpaji the ra ang ai shara kaw ap nawng daw jau mat sa wa na lam tsun ai rai nga ai.
