Majan byin ai lam nnga ai rai tim, Myen hpyen dap maga Jet Fighter nbungli hte mung shawa ni nga ai Han Htet Mare mung shawa tsi rung makau hta wa gap bun kau da ai lam chye lu ai.
June 16 ya shana hkying 10 daram hta, Mandalay Tada Oo na lung wa ai Myen hpyen jet fighter nbungli langai hte Manje Ginwang Han Htet mare mung shawa tsi rung shingdu hta wa gap bun kau da ai lam shawng lam hpyen shi sawk ni kaw na chye lu ai re.
“Hpa Majan mung n byin ai Manje de majan byin taw nga ai re nga yang gaw hpyen la ni ndai Han Htet Tsi rung kaw tsi tsi la taw ai she n shadu i? Han Htet Tsi rung hpe sha-ang na wa gap bun ai gaw rai nga ai, makau kaw wa hkrat ai, tsi rung shingdu hkau na pa langai na yi wa kaw wa hkrat ai, masha gaw hpa n byin ai,” nga tsun dan ai re.
Myen hpyen dap wa gap bun ai shara gaw, KIA hte pawng hpawm dap ni htim gasat zing madu da ai Han Htet Mare mung shawa tsi rung shingdu maga hkauna pa yin wa hta wa hkrat ang ai re lam chye lu ai.
Myen hpyen dap gaw, ya ten KIA hte pawng hpawm dap maga zing madu da ai mung shawa tsi rung ni hpe madung yaw shada let htim gasat nga ai masa re lam, shawng lam magam gun ni tsun maram nga ai re.
Han Htet mare mung shawa tsi rung hpe wa gap ai rai tim, tsi rung hten ai lam n nga ai sha, shingdu maga na mung shawa dum nta hte Mam dum ni hkra hten ayai mat ai re lam chye lu ai.
Ya ten dai ginra de majan gap gasat hkat ai lam n nga ai rai tim, Myen hpyen dap maga ya na zawn hpyen nbungli hte yaw shada lam nga nga hkan gap gasat taw ai rai nga ai.
