Majan Byin Ai Lam N Nga Ai Rai Tim, Uru Ginwang De Nbungli Bawm Wa Jahkrat Bun
Majan byin ai lam n nga tim, Myen hpyen dap maga Hpakant KIA Dapba 9 de Jet Fighter nbungli hte wa gap bun wa ai lam chye lu ai.
June praw 9 ya shana maga de Hpakant KIA Dapba 9 shara hte Dung 6 shara ni hta nbungli hte shara lahkawng bawm wa jahkrat bun kau da ai nga, dai ginra na lit nga ai ni KNG shiga dap de ndai zawn tsun dan wa ai re.
“Mana bawm wa jahkrat ai teng ai, shan hte shadu ai shara ni kaw wa jahkrat kau da ai ga rai nga ai, Dapba 9 kaw langai wa hkrat, Dung 6 de langai wa hkrat re re ga rai nga ai, masha gaw hpa nbyin ai nga tsun ai.” nga tsun dan ai re.
Myen hpyen dap maga na ya na zawn nbungli hte bawm wa jahkrat bun ai lam gaw, Myen Balik langai KIA dap de laknak jahkrat shang wa nna, dai balik bai hprawng mat wa ai hte rau ya na zawn nbungli hte sa gap bun wa ai re nga, dai ginra na lit nga ai ni matut tsun maram da ai re.
Ya hprawng mat ai balik gaw Han Htun Oo ngu ai wa rai nna, June praw 8 ya shana hka shin sa ai kaw na hprawng mat ai gaw, Hpakant Myen hpyen byuha dap de hprawng bang mat ai re lam chye lu ai.
