Dukaba Qukhkyawng Hkawng Lum N nga mat ai lam gaw, dip da hkrum ai mung shawa hte rawt malan hpung ni yawng a matu sum machyi kaba re lam, Jinghku Rawt Malan pawng hpawm dap kaw na tsun

Wunpawng Mungdan Shanglawt Hpyendap KIA Dap Awn Daju, Lat Du Daju Jum Dukaba Qukhkyawng Hkawng Lum n nga mat wa ai lam hte seng nna, Dukaba Sumlut Gun Maw hte Jinghku Rawt Malan Pawng hpawm hpung ni kaw, myit npyaw, yawn hkyen lawm ai lam tsun ndau wa ai re.

Dukaba shi a facebook ntsa ka mara da ai hta, 2024 ning May 13 ya shani du hkra man ang ai magam lit ni hpe kang ka ai hte shakut shaja lai wa sai rai nna, an lahkawng pawng yang KIO a matu leng gap mi n-gun re lam jahkring hkring tsun ai nga, Dukaba Sumlut Gun Maw tsun da ai re.

KIA Dap Awn Daju Dukaba Qukhkyawng Hkawng Lum gaw May 13 ya shana hkying 6 chyen ten madu yesu hta yup pyaw mat wa sai rai nna, shi a hkum tsawp moi mang, makoi mayang lamang hpe May 16 ya shani galaw mat na re lam chye lu ai.

Jinghku rawt malan hpung masum rai nga ai Kokang MNDAA, Rahkaing AA, Balawng TNLA dap hpawm hpung ni kaw na mung, ya ten Dukaba n nga mat wa ai gaw, Jinghpaw Wunpawng amyu sha yawng hte, Myen mung rawt malan hpung ni yawng a matu, hpa hte mung galai n lu ai sum machyi kaba re lam tsun da ai re.

Ya na zawn Dukaba n nga mat wa ai lam gaw, dip da hkrum ai myen mungdan, mung shawa hte jinghpaw wunpawng amyu sha yawng a matu hkrat sum kaba langai re lam, jinghku rawt malan hpung ni hkam la nna, myit rum share ninghkring ni yawng hte maren sha hkam sha lawm ai lam tsun da ai re.

Matut na rai tim dai laika hta, Dukaba gaw 1988 ning kaw na,Ya shi n nga mat wa ai ten du hkra rawt malan  magam yi ngam hta shakut shaja gun hpai lai wa nna, shi a jawng ma ten hta Ting Se Bass dum ai madum ninghkrai langai mung re hte, sha a chyoi hpa lam ni tsun chye ai ningbaw kaja langai rai nna, masha yawng a tsaw ra myit hpe hkam la lu ai wa re lam tsun da ai re.