Sezin Balik Dap Hpe Zing Madu Ai Hpang Myen Hpyen Dap Shara Hpe Matut Htim Gasat Nga
Sezin mare balik dap hpe KIA htim gasat zing madu kau ngut ai hpang, Myen hpyen dap shara hpe matut htim gasat taw nga ai lam ginra masha ni kaw na chye lu ai.
Sezin mare num shang na dap kaba hta Sam Hkyeng SNA hte Myen hpyen dap ni pawng hpawm dap jung nga ai hpe KIA dap maga sa htim gap gasat taw sai re lam, shawng lam magam gun langai KNG de tsun dan wa ai re.
“Shan hte hpe laknak jahkrat na matu tsun sadi jaw ai, dai hpe n hkap la ai majaw, dai ni shani ka- ang hkying 11 daram kaw na htim gasat hpang taw nga sai, majan gaw laja ai, nbungli hte mung sa gap ai,” nga tsun dan ai re.
Sezin Mare Myen hpyen dap kawng hta ya ten hpyen n-gun 50 daram dap jung shara jahkrat taw nga ai rai nna, majan laman lahkawng maga si hkala ai lam gade daram nga ai ngu hpe a tsawm tup hkrak n chye lu ai re.
Sezin mare hpe April praw 9 ya shani kaw na htim gasat hpang wa ai gaw, dai shani hta jang Sezin mare na Balik dap ni lata sharawt asum jaw wa ai re.
Laknak jahkrat asum jaw ai hta, Balik hpyenla marai 21 hte hpawn sinat laknak machyu pala ni hpe zing madu la lu wa ai lam chye lu ai.
Majan byin wa ai majaw, Sezin mare makau grup yin na mung mare masha ni gaw tinang man ang ai shara ni de hprawng yen taw nga ai re.
Hpakant ginra na Gwihka, Tamahkan Myen hpyen dap shara ni hpe KIA htim gasat zing madu da lu ai hpang, ya na zawn Sezin mare hpe bai htim gasat hpang wa ai rai nga ai.
