Ginra masa lam hta ahkyak ai Han Htet Myen Hpyen Dap hpe Zing Madu
![](https://kachin.kachinnews.com/wp-content/uploads/2024/04/435159052_826377259523547_7231682773667227222_n-780x470.jpg)
Manmaw hte Mandalay lam kaba n tsa na, Han Htet Myen hpyen dap hpe Wunpawng Mungdan Shanglawt Hpyen dap KIA maga dai hpawt manap hkying 8 daram hta htim gasat zing madu kau lu sai lam chye lu ai.
Han Htet Myen hpyen dap hpe, April praw 3 ya shana kaw na htim gasat hpang wa ai gaw, dai hpawt April praw 5 ya jahpawt htim gasat zing madu la wa ai rai nna, Myen hpyen dap maga Y-12 nbungli hte bawm sa jahkrat bun ai lam ni ding yang galaw taw nga ai nga shawng lam magam gun langai KNG shiga dap de tsun dan wa ai re.
“Han Htet Myen hpyen dap lu zing sai, lu shang sai, Myen ni mana kaw na mi hprawng pru mat sai, anhte maga na dai hpawt she dap jasan ai lam galaw ai, dap jasan ai lam galaw ngut ai hte nbungli hte bawm bai sa jahkrat bun wa ai majaw, dai kaw na jahkring bai gan yen mat ai,” nga tsun dan ai re.
Dai dap shara na Myen hpyen hpung ni gaw, April praw 4 ya shana hprawng pru mat wa ai rai nna, KIA dap maga April praw 5 ya jahpawt hkying 6 daram hta dap jasan ai lam ni hpe galaw wa ai rai nga ai.
Dap jasan galaw taw nga ai ten, Myen hpyen dap maga Y-12 nbungli hte laja lana bawm sa jahkrat bun wa ai majaw, dai shara kaw na jahkring mi gan yen taw nga ai lam matut tsun dan ai re.
Myen hpyen hpung ni Han Htet dap na pru mat wa ai hpang, Manmaw Gara Yang hte Man Je mare kata na laknak kaba ni hte gap bun wa ai re lam chye lu ai.
Ya na zawn nbungli laknak kaba ni hte gap bun ai majaw, Hanhtet Mare na mung shawa dum n’ta nkau hten hkrum ai lam hte, mung shawa langai hkala hkrum wa ai re.
Ya ten dai dap shara na hprawng pru mat ai Myen hpyen hpung hpe KIA dap maga hkan shachyut gap gasat taw nga ai zawn, Myen hpyen dap maga na mung hkap shingla gasat ai lam ni nga taw ai nga shawng lam magam gun ni tsun ai re.
Han Htet Myen hpyen dap gaw, Manmaw Mandalay Mung Hkawng, Shwegu lam mazup hta nga ai dap shara re majaw, hpyen masa lam hta ahkyak ai shara re nga tsun ai.