KIA Ginjaw Ginra Mayan Hta Myen Hpyen Dap Nbungli Hte Sa Gap Bun Ai Majaw, Dum N’ta Ni Hten
![](https://kachin.kachinnews.com/wp-content/uploads/2024/03/16f3ead0-9b56-4245-ae77-ccff1dccfc78-567x470.png)
KIA Ginjaw Ginra Laiza makau grup yin hta majan sum machyi taw nga ai Myen hpyen dap gaw, Laiza makau grup yin ni hta dai hpawt manap jau kaw na n bungli, laknak kaba ni hte gap shadam bun taw nga ai lam Laiza ginra masha ni tsun ai re.
Myen hpyen dap kaw na nbungli hte bawm kaba sa jahkrat bun ai majaw, Laiza mare kata na dum nta law law hkra hten ai lam ni nga taw nna, Miwa hkran de hkrat kapaw ai lam ni mung nga taw ai re.
“Dai hpawt manap jau kaw na laknak kaba grai gap bun taw ai, Miwa hkran maga mung hkrat kapaw ai, Laiza kata mung hkrat ai, shani ka-ang hkying 10 daram hta nbungli hte bawm kaba sa jahkrat bun ai, myo ting kanan mat ai, nta pat ni yawng ga ai,” nga tsun ai re.
Myen hpyen dap maga gap bun dat ai laknak kaba si Miwa hkran maga yawm htum laknak kaba si 3 wa hkrat nna, dum nta hkru hten ai lam ni mung nga wa ai re.
Ya na zawn Myen hpyen dap sum machyi lam law wa ai majaw, majan hte nseng ai mung shawa ni nga ai shara ni hta, ya na zawn laknak kaba, nbungli hte gap sharu bun wa ai re nga ginra masha ni tsun ai re.
Ndai shata praw 7 ya jahpawt kaw na Myitkyina Manmaw lam kaba ntsa Myen hpyen dap shara law law hpe KIA hte Rahkaing AA, KPDF, Jawng Ma dap ABSDF, hte laga rawt malan dap ni pawng hpawm nna, htim gasat taw nga ai re.
Dai zawn htim gasat ai hta, dai lani mi laman Myen hpyen dap shara 16 hpe htim gasat zing madu la lu wa ai rai nna, Myen hpyen dap maga lanak machyu pala alaw alam padang dip zing madu la lu wa ai re.
Myen hpyen dap zing madu la lu ai hte rau Myen hpyen bawng masha marai 30 daram hpe mung lu rim da ai lam chye lu ai.
Ya ten Laiza mare ntsa hta Myen hpyen kai chyan ကင်းထောက် Drone ni ding yang pyen gayin taw nga ai nga, Laiza ginra masha ni tsun ai re.
Ya ten Laiza makau grup yin ni hta hpyen majan laja lana matut gap gasat hkat taw nga nna, Myen hpyen dap maga sum machyi lam law taw nga ai re.