Pangsai Ginra hta Kokang MNDAA Dap Ni Kaw Na Mung Shawa Hpe Jahkrit Shama Up Sha Nga
Pangsai ginra hta up madu taw nga ai Miwa Kokang dap ni gaw mung shawa hpe jahkrit shama up madu taw nga nna, Dingdung Sam Amyu sha rawt malan hpung SSPP hte Wunpawng Mungdan Shanglawt Hpyen Dap KIA ni, Pang Sai ginra kata de hpyen hking hpun nna tsep kawp n mai shang ai lam, mung shawa ni hpe zuphpawng shaga galaw ai hta, tsun wa ai lam ginra masha ni kaw na chye lu ai.
Dai zuphpawng galaw ai hta Phone hte sumla tsep kawp n gayet lu na hte, Phone ni yawng pat da shangun nna, zuphpawng woi galaw wa ai re lam chye lu ai.
Ya ten Pang Sai mare hta Kokang Miwa dap ni kaw na mung shawa ni hpe jahkrit shama ai hte bungli ni galaw shangun taw nna, Kokang hpyen la ni hpe shat shadu jaw shangun taw nga ai lam dai ginra na mung shawa langai KNG de ndai zawn tsun dan wa ai re.
“Pangsai ginra kaw Kokang MNDAA dap ni gaw shan hte zing da ai Myen asuya rung hkan shani shagu jasan jaseng bungli galaw shangun taw ai, nlu sa ai ni hpe miwa gumhpraw Yun 150 shawa ai, shana hkawm ai ni hpe rim nna, hpyen wunkat de sa kau ai, majan ten laman rai lagu ai ma shan hte miwa hpyen la ni sha re, dai hpe mung shawa ni hpe bai shadu, anhte mare ka-ang kaw nga ai ni gaw grai nga yak taw ai,” nga tsun ai re.
Dai zuphpawng hpe February 11 ya shani woi shaga hpawng wa ai rai nna, dai zuphpawng hta madung ahkyak ai lawng lam 5 hpe tsun mat wa ai lam chye lu ai.
Dai tsun mat wa ai lawng lam hta Pangsai ginra hta laknak lang hpung KIA, SSPP dap ni hpyen hking lang na tsep kawp nshang lu na, lu da ai laknak nga yang MNDAA hpe lawan sa ap ra na, n sa ap na mu kasawk jep yang ja ja ahkyak la na lam, Pang Sai muklum uphkang rung hta mung shawa ni lana mi langai sa sin yup ra na lam, hte Kokang MNDAA hpyen la ni hpe shat shadu jaw na matu, shata mi miwa gumhpraw Yun 50 hta mat wa na lam ni hpe tsun wa ai re.
Ya ten dai ginra hta Kokang dap ni kaw na mung shawa ni hpe jahkrit shama shagyip shagyeng rai up madu nga ai majaw, dai ginra na mung shawa ni nga yak taw nga ai lam ginra amyu shayi langai ndai zawn matut tsun ai re.
“Shana yuptung hkan mung mare kata hkan sinat kam ai hku gap anhte mung shawa ni gaw kajawng ai le hprawng ra na zawn zawn hpa byin ai re mung n chye, galoi mung hkrit ra na hkrai nga taw ai, mai byin yang gaw KIA KIA a npu kaw sha nga mayu ai, gadai na npu kaw mung n kam nga sai,” nga tsun dan wa ai re.
Munggu Hpawng Seng hte Pangsai ginra hpe Kokang dap ni kaw na, 2023 ning November shata hta htim gasat zing madu kau ai rai nga ai.
