KIO Ginjaw Ginra, Nahpaw Myen hpyen dap de malu masha wa htaw sa ai Myen hpyen Holicopter nbungli langai hpe Wunpawng Mungdan Shanglawt Hpyen dap KIA, gap jahkrat kau lu ai lam chye lu ai.
Dai hpawt manap hkying 11 aten daram hta Myitkyina kaw nna Nahpaw Myen hpyen dap de malu masha hte hpyen lang arung arai wa htaw sa ai Holicopter nbungli lahkawng lung wa ai ten nbungli langai hpe gap jahkrat kau lu ai re lam, Dukaba Nhpang Naw Bu, KNG shiga dap hpe tsun shateng ai re.
“Myitkyina de na lung wa ai Holicopter 2, Nahpaw Myen hpyen dap de malu masha wa htaw sa ai, dai hpe anhte maga na hkap gap ai hta langai gap jahkrat kau lu ai, dai ni hkying 11 minute 50 daram hta re” nga tsun ai re.
Gangdau Yang Myen hpyen dap hpe lai wa sai shata 2 daram hta KIA htim gasat zing madu kau ngut ai hpang, dai ginra de malu masha hte hpyen lang arung arai htaw shalai na yak hkak mat ai majaw, Holicopter nbungli hte wa htaw sa ai ten gap jahkrat hkrum ai re lam chye lu ai.
Dai dap shara gaw lai wa sai 1987 ning hta KIA tat sum kau ai dap shara re lam chye lu ai.
Lai wa sai Alaw Bum majan hta gap jahkrat kau lu ai hte rai yang, ndai 2 ning jan laman hta Myen hpyen nbungli lahkawng hpe KIA gap jahkrat kau lu sai rai nga ai.
