Shwegu mare kaba kaw na pru wa ai Myen hpyen dap hpe, KIA hte PDF pawng hpawm dap ni lam lapran hkap shing la gasat ai hta Myen hpyendap maga sum machyi lam law wa ai nga Shwegu PDF lit nga ai ni kaw na chye lu ai.
January praw 3 ya jahpawt hkying 8 daram hta Shwegu mare lawu, lam numbraw hta dap jung nga ai Myen hpyen n-gun 30 daram gaw, Win Wa mare maga de hpyen shamu shamawt pru wa ai hpe hkap shingla gasat dat ai re lam dai ginra na PDF lit nga ai salang langai KNG shiga dap de ndai zawn tsun ai re.
“Dai Myen hpyen hpung ni dai shara makau grup yin hta shamu shamawt ai na sai, shan hte pru wa na hpe shiga lu ai majaw, anhte mana kaw na hkap taw ai kaw dai hpawt hkying 8 ram hta pru wa ai hpe hkap gap ai re, loi gaw hkala sam ma ai, tsawm ra kyin mat wa ma ai,” nga nna tsun dan ai re.
Dai ginra hta Myen hpyen dap ni shamu shamawt taw nga ai nga, shiga na ai majaw tau hkrau kaw na sa hkap gasat ai majaw, tang du ai lam nga nga matut tsun ai re.
Dai Myen hpyen hpung ni gaw, Shwegu daju Hk.M.Y 602 hte Hk.L.Y 56 dap ni rai nna, hkying hkum mi jan gap gasat hkat wa ai re lam chye lu ai.
Dai gap gasat hkat ai hta, Myen hpyen dap maga gade daram kaning rai si sum machyi ai ngu hpe a tsawm tup hkrak n chye lu ai rai nna, dai Myen hpyen hpung ni Shwegu mare de bai n htang shang mat wa ai re.
Dai shara hta lai wa sai November shata kaw na Myen hpyen dap hpyen n-gun kaba hte wa du dap jung da ai shara rai nna, hkawm sa hkawm wa mung shawa ni hpe laja lana san jep ai shara mung re lam chye lu ai.
Shwegu Myen hpyen dap ni gaw, Majan byin ai lam n nga ai rai tim, laknak kaba gap shadam bun ai lam ni jahkring hkring galaw taw nga ai re.
