October 27 ya shani kaw na hpang wa ai, 1027 majan masing shata lahkawng laman, mung shawa marai 130 jan asak si sum wa ai lam, CSO wuhpung ni tsun ndau da ai re.
Majan lapran hta Myen hpyen dap hte Dingdung daw dap hpawm hpung lahkawng maga laknak kaji kaba gap bun ai lam hte, nbungli ni hte wa htim gap gasat ai lam ni a majaw, si sum wa ai re lam, Sam shinggyim ahkaw ahkang wuhpung ni kaw na tsun madi madun da ai re.
“Ndai 1027 majan masing laman hta si hkala law dik gaw mung shawa ni re, dai hta madung amyu shayi hte ma kaji ni hkra machyi ai, ya na zawn madung si hkala law ai gaw, Myen hpyen dap nbungli na majaw re hpe mu lu ai, number lahkawng gaw laknak kaba si a majaw re, dai hta dingdung daw dap hpawm maga na mung, mung shawa nta ni hpe ninggang shatai na majan htim gasat ai lam ni hpe mu lu ai,” nga tsun da ai re.
Dai zawn si hkala ai lam hta ma kaji marai 28 lawm nna, law malawng amyu shayi ni re lam tsun da ai re.
Ya na zawn mung shawa asak si sum ai gaw, nbungli hte laknak kaba si a majaw re lam tsun madi madun da ai re.
Dai hta dap hpawm hpung maga de na mung, mung shawa dum nta ni hpe ninggang shatai let htim gasat ai hpe mu lu ai lam tsun da ai.
Sammung daju Balawng amyu shayi hpung maga de na mung, ndai shata lahkawng laman asak si sum ai marai 130 jan hta ma kaji marai 28 lawm nna, hkala hkrum wa ai yawng marai 250 daram nga ai lam tsun da ai re.
1027 majan masing shata lahkawng laman hta Mai Lung, Namhkam, Mandung, Namsan, Namdu, Chin Shwe Haw, Kun Lung, Munggu, Pang Sai hte Kung Chyan mare kaba ni hpe dingdung daw dap hpawm maga zing madu da lu ai hpe mu lu ai re.
Matut na rai tim, Kutkai Ta Mung Nye de, majan matut laja taw nga nna, Myen hpyen dap maga nbungli ni hte wa htim gap gasat ai lam ni mung ding yang matut nga taw ai lam chye lu ai.
