Sammung Namdu mare kaba hpe Balawng TNLA dap ni December 28 ya jahpawt manap jau hkying 4 daram hta htim gasat zing madu la lu sai lam, Balawng dap maga tsun ndau da ai re.
Namdu mare kaba hpe lai wa sai December 25 ya shani kaw na htim gasat hpang wa ai gaw nhtoi masum ya ngu na hte htim gasat zing madu kau lu ai lam tsun da ai re.
“Namdu mare Myen hpyen byuha dap Hk.M.Y (324) hte hpawn Man tsan dap, Pan tabye dap, Nawng Seng dap, hte Namdu balik dap yawng hpe December 28 ya jahpawt hkying (1:30) hta gap gasat zing madu kau lu sai,” nga tsun ndau da ai re.
Majan laman hta Myen hpyen dap maga de na Jet Nbungli hte (25) lang , Mi 35 Holicopter hte (9) lang, Y -12 Nbungli hte (29) lang bawm wa jahkrat bun wa ai lam nga wa ai hpe chye lu ai.
Dai nhtoi 4 ya laman hta, nbungli hte (61) lang wa gap ai hta, Bawm 218 wa jahkrat bun kau da ai lam tsun ndau da ai re.
Namdu majan hta mung shawa marai 2 asak si sum wa nna, marai 8 daram hkala hkrum wa ai hte dum n-ta 20 jan hten hkrum ai lam chye lu ai.
Namdu Myen hpyen dap hpe zing madu la lu ai hta, amyawk kaba gap ai laknak kaba 2, laga sinat hpan hkum hte laknak machyu pala alaw alam lu zing madu la ai lam chye lu ai.
Balawng TNLA dap ni kaw na, Namhkam mare kaba hpe zing madu la ngut ai hte, Namsan, Mandung, Namdu maga de bai htim gasat wa ai gaw, ndai 10 ya laman hta mare kaba masum hpe bai htim gasat zing madu la lu wa ai mung rai nga ai.
Myen hpyen dap maga de na mung, Namsan, Namdu hte Mandung mare kaba ni hpe ntat sum hkra, nbungli hte laja lana wa htim gap gasat ai rai tim, lagaw lam dap hku na hpyen garum tsep kawp n lu jaw mat ai majaw, dai ginra yawng hpe tat sum kau ra ai masa re lam, ginra masha ni tsun maram da ai re.
ya ten Balawng TNLA dap ni kaw na, Sammung ginra na, myo mare kaba 5 hpe htim gasat zing madu da lu sai re lam tsun tawn ai re.
