Putao Lungsha Yang mare hta, Myen hpyen dap shara bai jahkrat na matu, dap hpe kring mading bai gaw gap hpang taw nga sai lam, ginra masha ni kaw na chye lu ai.
December 10 ya jan hta, Putao maga de na yu wa ai Myen hpyen hpung ni gaw, mung shawa dum n’ta hte Hpaji jawng wang, tsi rung wang ni hta shara wa jahkrat nna, moi na dap shara hta bai wa gaw gap taw nga ai lam dai ginra na mung shawa langai KNG shiga dap de tsun ai re.
“Putao kaw na Mawdaw kaba lahkawng hpring hkra yu wa nna, Lungsha Yang makau grup yin hta shara jahkrat da ma ai, Nhka ga na pru wa ai ni mung yawng lawm ai nga tsun ai, mung shawa nta hte hpaji jawng tsi rung wang ni hta shara jahkrat nna, dap shara gaw gap nga ma ai, hpun ret jak hkan na hpun pyen ni htet la rai,” nga tsun ai re.
Ya ten Lungsha Yang hta wa du dap jung na hkyen ai Myen hpyen hpung gaw, Nhka ga de na hting nut pru wa ai Myen hpyen hpung ni re lam chye lu ai.
Myen hpyen dap ni kaw na, ya na zawn dap shara ningnan bai sa jahkrat wa ai majaw, mare kata majan laja wa na hpe ginra masha ni myit tsang nga ma ai re.
Ndai myen hpyen hpung ni gaw, Lai wa sai 2022 ning February shata hta wunpawng mungdan shanglawt hpyendap KIA kaw nna, sa gasat wan nat jahten kau ai, Lungsha yang mare kata na hpyendap kawng hta kalang bai hpyendap wa jung na matu, galaw nga ai re.
Ya ten, Backhole ni hpe htu shara ai lam, ga gaduk n hkun htu ai lam, hpun ret jak na hpun pyen hte kawa ni htet la nna dap shara dum nta gaw gap ai lam ni hpe galaw taw nga ai lam ginra masha ni tsun dan ai re.
Dai zawn galaw nga let, mare kata mung shawa dum n ta hkan, shang nga shang yup nna, nkau gaw, hpaji jawng hkan, hpunggyi jawng hkan shara la nga ai sha n ga, shana shagu mare group group Drone hte shimlam dingyang la nga ai lam chye lu ai.
Sumpyi yang hte Lung sha yang dai ginra mayan lai wa sai 2022 ning February shata hta myen hpyendap hte Wunpawng Mungdan shanglawt hpyendap kia lapran majan laja lana byin wa ai majaw, mung shawa ni nam kata hte mare kaba hkan hprawng yen ra mat nna, April shata hta sha dum nta bai wa nga nga ai rai nga ai.
Ya ten Putao ginra hta myen hpyendap grak lagra dung nga ai hpyendap shara ni gaw, Sumpra Bum myen hpyendap, Sumpyi Yang hte Lung sha yang rai nna, Putao maga gaw Mular shidi gate kaba ni re lam chye lu ai.
