Asak aprat ram ai ramma shayi shadang ni yawng, rawt malan magam bungli hta shang lawm gun hpai na matu KIO Dingda Ginwang Ginjaw, November 20 ya shani ndau dat sai re.
Dai laika hta, ya ten Myen hpyen dap gaw shara shagu majan sum machyi ai hte hpyen dap shara laknak machyu pala, masha n-gun law law hkrat sum n-gun kya nga ai ten hta Wunpawng Mungdan a lamu ga hpe gasat zing madu ka-up la lu na matu asak aprat ram ai ramma shayi shadang ni yawng Rawt malan magam bungli hta shang lawm gun hpai na matu tsun da ai rai nga ai.
Rawt malan galaw ai shaning na wa ai hte maren, Wunpawng Mungdan Shanglawt Hpyen Dap kaw nna woi awn ai hte tai hpyen dap shara gasat zing la ai lam madang shatsaw n-gun dat galaw nga ai lam dai n dau laika hta matut tsun da ai re.
Myen hpyen dap daru magam zing kau ai hpang, Dingdung dap dap hpawm hpung ni kaw na, 1027 Majan masing hpang wa ai kaw na, Dingda Ginwang Ginjaw kaw na mung Myen hpyen dap shara 3 hpe lu htim gasat zing madu da lu sai re.
Matut na rai tim, ya ten Mungmyit Sinli hta nga ai Myen hpyen dap hpe rawt malan jinghku wuhpung ni hte rau matut htim gasat sa wa na re lam chye lu ai.
