Myitkyina-Manmaw lam n tsa, dai ni lani mi laman shara 3 hta Myen hpyen dap hte Wunpawng Mungdan Shanglawt Hpyendap KIA lapran majan bai byin ai re.
September praw 6 ya jahpawt manap jau hkying (5:00 am) aten daram kaw nna, Japu, Sama lam numshe lahpra hkashi makau hta laja lana gap gasat hkat wa ai rai nna, Katsu kaw dung ai Myen hpyen dap ni kaw na, Baknan Yang hte Ba Gam Yang maga de laknak kaba ni hte ding yang gap shadam bun taw nga ai lam chye lu ai.
Lai wa sai August shata hta Myitkyina maga de na htu tawn ai Myen hpyen n gun 100 jan gaw, Bak Nan Yang hte Bagam yang maga de htu shadut wa ai hpe KIA dap ni wang matep da ai majaw, pru wa mung n mai rai dai shara hta chyat rawng nga nna, lu sha dumhprut ai majaw lai wa sai August 31 ya shani Holicopter nbung li lahkawng hte lu sha sa jahkrat jaw kau da ai lam shawng lam magam gun langai KNG de tsun dan ai re.
“Sama lam numshe hta dai hpawt jau mi hprim hpram re ten kaw na ngoi ai, hkring dat ngoi dat re ga rai nga ai, Dabak, Japu, Mali dai mayan hta Myen hpyen n gun 100 jan chyat rawng taw ai pru wa mung n mai rai, dai ni hpe shaw la lu na matu Bak Nan Yang hte Ba Gam Yang maga de laknak kaba ni hte ding yang gap shadam bun taw nga ai ga rai nga ai.” nga tsun dan ai re.
Madi Yang hta rawng nga ai Myen hpyen dap ni shamu shamawt pru wa ai majaw, dai ni shani ga-ang hkying 11:30 Am daram aten kaw nna, lahkawng maga bai gap gasat wa ai hta, Hkaya bum hta dung ai Myen hpyen dap ni kaw na laknak kaba ni hte gap bun wa ai lam chye lu ai.
Manmaw maga de na, Namsan hpyen man maga de lung wa ai Myen hpyen mawdaw 6 hpe dai hpawt manap jau myi rai n mu shi ai ten, Loi Jaw Bum kadawng hta hkap shing la gasat dat ai lam chye lu ai.
Dai zawn lahkawng maga gap gasat hkat ai hta si hkala sum machyi ai lam hpe a tsawm tup hkrak n chye lu ai re.
Myitkyina Manmaw lam n tsa hta Myen hpyen dap maga de na hpyen n gun kaba hte htu shadut taw ding yang rai nna, shani shagu ngu na majan gap gasat hkat taw nga ai re lam chye lu ai.
