Shwegu ginwang, Ginwang uphkang rung hpe Shwegu KPDF dap ni September praw 7 ya jahpawt daw Drone hte bawm sa jahkrat bun ai hta, si hkala hkrum wa ai lam chye lu ai.
Shwegu lawk 4 Bawga Bala lawk na, ginwang uphkang rung hpe Drone hte bawm numdaw 2 lang sa jahkrat bun ai hta, rung magam gun marai 10 hte madi shadaw laika sa la ai mung shawa langai, yawng marai 11 hkala hkrum wa ai lam chye lu ai.
Dai rung hta seng ang ai dap lakung shagu na magam gun ni zuphpawng galaw nga ai hpe shading nna sa jahkrat bun ai rai tim, zuphpawng ngut ai ten sa ang mat ai majaw, shingte ai ni kaw n ang mat ai nga Shwegu PDF na lit nga ai ni KNG shiga dap de ndai zawn tsun dan ai re.
“bawm sa jahkrat ai 8 hte kapaw ai, dai sa jahkrat na shawng kaw sha zuphpawng ngut mat ai ten ang mat ai, hkrat ai chyawm zuphpawng gawk kaw nan ang ai. ya hkala hkrum ai marai 11 tsi rung kaw du sai.” nga tsun dan ai re.
Dai zawn Ginwang uphkang rung gap gasat hkrum ai hpang, shani ka ang hkying 12 hpang kaw na, Shwegu Myen hpyen balik dap kaw na, Shwegu makau grup yin na mare kahtawng ni de laknak kaba hte gap shadam bun wa nna, pru shang lam ni yawng hpe jahkring gan pat da ai lam chye lu ai.
Shwegu ginwang Myen hpyen dap rung hte Balik dap ni hpe KPDF dap ni drone hte bawm jahkring hkring sa jahkrat bun nna, September praw 4 ya jahpawt Shwegu Balik dap hpe sa jahkrat bun ai hta si hkala lam ni nga wa ai re.
