Manmaw, Mye Nu Mare kaw nga ai PDF ramma langai ndai laman Myen hpyen dap shingwang kata de shang mat ai hpang, Myen hpyendap ni gaw PDF hte matut mahkai ai ni hpe matut manoi sawk rim hkawm taw nga ai lam, ginra masha langai tsun ai re.
“Dai wa gaw PDF Wunkat yu la sai masha re hte Mye Nu Mare na masha ni tsun ai gaw Kanu Kawa ni nan sa ap ai re nga ai. Kanu Kawa gaw mi kaw na Myen hpyen dap hpe madi shadaw ai ni re” nga tsun ai .
Myen hpyen dap de shang mat ai PDF hpyen la gaw KPDF Masat yan (2) kaw jawng yu la ai rai nna, mying hpe gaw tup hkrak n chye lu shi ai re.
Shi Myen hpyen dap de du mat ai hte kalang ta Ting Daw Gyi kaw shanu nga ai asak 20 ram re Tat Nai Htum ngu ai ramma langai hpe PDF ni hte matut mahkai ai nga na May 16 ya shani, dum n’ta kaw na Myen hpyen dap ni sa rim woi mat ai lam chye lu ai.
Bai nna, Manmaw Ginwang kata PDF hte matut ai ni hpe hkan rim hkawm taw nga ai re.
Myen hpyendap gaw, ya ten PDF hta magam gun nga ai ni, matut mahkai ai ni hpe, Myen hpyendap a shingwang kata de bai shang wa na matu May shata 9 ya shani, hpyen dap madu ai TV hte Journal shiga ni kaw na ndau dat ai re.
Bai nna, dai ndau laika ni hpe Jinghpaw Mung kata Mogawng, Hpakan, Manmaw, Kamaing kata masha law nga ai shara ni hta pyen dau shakap nna ndau da ai hpe mung mu lu ai re.
