𝐌𝐮𝐧𝐠𝐥𝐚𝐢 𝐇𝐤𝐚 𝐤𝐚𝐰 𝐥𝐢𝐦 𝐬𝐢 𝐚𝐢 𝐉𝐚𝐰𝐧𝐠𝐦𝐚 𝐚 𝐦𝐨𝐢𝐦𝐚𝐧𝐠 𝐡𝐩𝐞 𝐧 𝐡𝐭𝐨𝐢 𝟒 𝐲𝐚 𝐧𝐚 𝐚𝐢 𝐡𝐩𝐚𝐧𝐠 𝐦𝐮 𝐭𝐚𝐦 𝐬𝐚𝐢.

Munglai Hka kaw, hka lim si ai jawngma a moi mang hpe Nhtoi 4 ya na ai hpang, Nazaret zinlawng sa wa ai hkrai noi lahta hte yang kaw mu tam sai lam Laiza ginra masha ni kaw na chye lu ai.

Nawng E Hku lahta tsang jawng kaw, jawng lung taw nga ai Shd Jangma Mung San Awng asak (18) ning re ai jawngma la kasha wa gaw,August 13 ya shana maga, manang marai 6 hte rau Munglai Hka kaw hka sa shin ai ten hka lim si mat ai rai nga ai.

Ya hka lim si ai jawngma gaw, Maija Yang lawk (4) kaw nga ai Slg, Jangma La Myen hte Kanu jan, Lahpai Hkawn San yan a kasha Shd, Mung San Awng asak (18) ning, Laiza Nawng E Hku Lahta Tsang jawng Boader kaw jawng lung laika sharin hkam la taw ai jawngma re lam chye lu ai.

Nawng E Hku Boader kaw rau nga manang ni rai nga ai, Shd Lahtaw Zau Shadang, Mading Sau Ying, Lahtaw Zau Dan Awng, Lahpai Zau Naw Hpring, Maran Seng Htoi Awng, Shd, Manam Sut Ring Doi ni hte August 13 ya shana maga hkying 4:30 Pm aten daram hta, shan hte manang marai 7 Munglai hka de hka shin sa ai kaw, Shd Jangma Mung San Awng Hka lim si hkrum wa ai rai nga ai.

Dai zawn hka lim si mat ai hpang, Shd Mung San Awng hpe makau grup yin kaw nga ai ni yawng lawan ladan jawm tam ai rai tim, n dai laman marang htu hka kaba ai majaw, dai lim si mat ai shana kaw na tam ai, n htoi 4 ya na ai hpang she mu tam ai lam Laiza ginra masha langai KNG shiga de n dai zawn tsun ai re.

“Dai na maga de hkying 5 daram kaw mu tam sai, yawng jawm tam ai gaw Munglai Hka mahkrai n tsa de hkrai tam, bai mu ai gaw, Munglaihka mahkrai npu, Nazaret zinlawng sa wa ai hkrai noi n tsa hte yang mu tam sai,” nga tsun ai re.

Munglai hka gaw, Miwa mung maga na lwi shang ai hka shi langai rai nna, Jeyang mare makau hku lwi hkrat ai hka re majaw, Jeyang hka ngu nna mung shaga ai re.

Jeyang hka gaw, Laiza hka hte wa zup ai hpang, Munglai hka ngu na mung bai shamying ai hka shi rai nga ai.
Dai Munglai hka kaw shaning shagu ngu na jawngma langai lahkawng hpe la ai hka re nga, Jeyang hpyen yen dabang na kanu num langai tsun ai re.

Ya hka lim ai shara gaw, Laiza hka hte wa zup ai lahta hte yang kaw byin mat ai rai nga ai.