Myitkyina Muklum kata lai wa sai April shata mi laman hta Mawdaw Sengke adawt ai amu manghkang 40 lang byin wa ai hta law malawng asak n hpring ai ma ni sengke jawn na byin ai manghkang law malawng re lam garumm kahtau hpung ni kaw na chye lu ai.
Lai wa sai shata kaw Mawdaw Sengke adawt ai amu manghkang 50 lang jan byin wa ai hta, masha si ai marai 6 re lam, seng ang ai balik rung the ni nawn ai kaw na chye lu ai.
Dai marai 6 si ai hta, asak n hpring ai 15, 16 re ai Ma marai 4 lawm ai nga garum kahtau na lit nga ai Salang langai KNG shiga de n dai zawn tsun ai re.
“Madung gaw asak n hpring ai ma ni, Sengke dep n dep re jawn hkawm ai majaw, speed n dang hkang ai majaw byin ai re ngu mu ai, ndai shata Mawdaw sengke adawt hkat ai majaw marai 6 si ai, dai kaw asak n hpring ai ma marai 4 lawm ai,” nga tsun ai.
Dai ma ni gaw, mawdaw sengke gau hkang ladat, lam ritkawp ni hpa n chye ai, dai hku n ta kaw nga ai sengke hpe majoi hta jawn wam hkawm re majaw byin ai lam re nga matut tsun da ai re.
Myitkyina kata lani hte lani mawdaw sengke grau law jat wa ai hte rau mawdaw sengke adawt ai lam ni jahkring hkring byin ai hpe mu lu nga ai re.
Myitkyina Muklum kata Mawdaw Sengke adawt ai amu manghkang lani the lani grau law wa ai lam mu mada lu nga ai re.
Ya na zawn, byin ai lam gaw, Lam rit kawp ni hpe a tsawm n galaw na, mung shawa ni hkan na hkan sa ai n-gun yawm ai lam a majaw re nga mung shawa ni tsun maram da ai re.
Maga mi de Mawdaw Sengke gawn hkang ai Balik ni, n tara ai mung shawa ni kaw na mawdaw sengke rim na gumhpraw majoi joi hpyi sha ai lam ni a majaw mung, ya na zawn byin ai re nga, mung shawa ni tsun maram da ai re.
Mawdaw Sengke adawt ai law malawng byin ai mawdaw gaw, tara n shang zaibru htaw mawdaw kaba ni grau law jat wa ai majaw, ya na zawn byin ai re nga, mung shawa ni tsun ai re.
Dai ning 2026 ning shata masum laman hta Myen mungdan ting madang kaw Mawdaw Sengke adawt ai amu manghkang lam 888 lang byin lai wa ai hta, si hkrum ai masha marai 486 du sai lam, ကုန်းလမ်းပို့ဆောင်ရေးနှင့် ညွှန်ကြားမှုဦးစီးဌာန n dau da ai kaw na chye lu ai.
Myen mungdan ting madang hta lai wa sai 2025 ning kaw mawdaw Sengke adawt ai amu manghkang 3348 lang byin wa ai hta, marai 1700 jan si hkrum w anna, marai 5000 hkawt gaw hkala hkrum wa ai lam matut tsun tawn ai hpe mu lu ai re.
